Oqaaseqartartoq: Aningaasat kalaallinut meeqqanut ikiuutaatinnginnerat pissusilunneruvoq
![](/sites/default/files/styles/image_934x467/public/article_images/soeren_espersen630.jpg?itok=X131t0L8)
Kalaallit meeraasa amerlaqisut innarlerneqartarnerannik nalunaarutit kingorna, 2019-imi Folketingip 80 miliuuni koruunit immikkut aningaasaliissutitut Namminersorlutik Oqartussanut nassiuppai.
Aningaasat taakkua meeqqanut atugarliornerpaanut ikiorsiissutaasussaapput, Sermersuumili meeqqanut ilaqutariinnullu pisortap Martha Lund Olsen-ip oqanera naapertorlugu, taakkua immikkut aningaasaliissutit meeqqanut iluaqutaanikuunngilluinnarput.
- Ikiorsiissutissat annerpaartaat Inunnik Isumaginninnermut Aqutsisoqarfiup 60-80-inik sulisoqarluni pilersinniarneqarneranut kiisalu kommunemi suleriaasissamut ikiuutaasussanik Danmark-imi kommunet socialrådgiver-inik sisamanik suleqatissiinissaannut atorneqarnikuupput, taanna tusagassiorfimmut Sermitsiaq.AG.-mut oqarpoq.
Tamanna Dansk Folkepartiimi Kalaallit Nunaat pillugu oqaaseqartartup, Søren Espersen-ip, narrujuummissutigaa.
- Isumaqarpunga aningaasanik allanut atuisimaneq pissusilunnerusoq. Tamanna iluariinnagassaanngilaq.
- Tamanna ilinniutigaarput. Inatsisit naapertorlugit Kalaallit Nunaannut tapiissutaasartunut ilassusiiginnarluta tapiissuteqartassanngilagut, siunertamut atorneqartassappata, taanna oqarpoq.
Søren Espersen-ip oqarnera naapertorlugu, ukiut qulit ingerlaneranni aatsaat Kalaallit Nunaat immikkut tapiissuteqarfigineqarpoq, taannalu nangippoq; Kalaallit Nunaata ”soorunami ilisimajuarnikuuaa aningaasat Danmark-imiit sunut atorneqartussiaanersutssanersut”.
Pisimasumulli Namminersorlutik Oqartussat kisimik akisussaasuunerarnerat eqqortuunngilaq.
Aaja Chemnitz Larsen, Inuit Ataqatigiit (IA) sinnerlugit Folketingimut ilaasortaq kiisalu Kalaallit Nunaat pillugu ataatsimiititaliami siulittaasoq.
Taassuma erseqqissarpaa, siunertamut Kalaallit Nunaat nammineq 20 miliuuni koruuninik aningaasaliisimasoq, suliniarnerlu Danmarkip Kalaallit Nunaatalu suleqatigiillutik ingerlatarigaat kiisalu meeqqanut suliniutit patajaallisarniarlugit taakkua 16-inik innersuussuteqarnikuusut.
- Aningaasat sunut atorneqarnerinut atatillugu, uagut Folketingimi ilaasortat Danmarkimi Nunatsinnilu naalakkersuisunit peqataatinneqanngilagut.
- Uanga pisimasoq assut isorinikuuara, aningaasallu pinaveersaartitsinermut siusissumillu suliliuteqartarnermut atorneqarnissaat kissaatiginikuullugu, taamaammat Nunatsinniit isorinninneq ilaatigut taperserpara, kisiannili Namminersorlutik Oqartussat kisimik skisussaasuunerarneqarnerat eqqortuunngilaq, taanna oqarpoq.
Danmarkimi inunnik isumaginninnermut ministerip, Astrid Krag-ip (S) kiisalu Meeqqanut, Inuusuttunut Ilaqutariinnullu Naalakkersuisup, Paneeraq Olsen-ip (Naleraq), apeqqarissaarfiginissaat Ritzau-ip iluatsinniarsaraa.