Operation Dagsværk kalaallit inuusuttaannut aningaasanik nassiussiniartoq

Aappaagu Operation Dagsværkeqarnerani aningaasat nunatsinni allannguinissamut, inuusuttut sakkussaqalernissaannut atorneqartussanngortinneqassapput.

Ilinniartut Operation Dagsværkimi aappaagu ullormi ataatsimi suligunik, aningaasartaat Kalaallit Nunaanni inuusuttunut ikiuissutaassapput.

Operation Dagsværkip suliniut Røde Korsip inuusuttaasa, kalaallit inuusuttaasa inuuniarnikkut unammillarnartunut sakkussaqalernissaannik suliniutaat toqqarpaat.

- Aningaasat kalaallit inuusuttaasa inuuniarnikkut allannguiniarnermut ilinniarnissaannut atorneqassapput.

- Kalaallit inuusuttaasa inuusuttunut ajornartorsiutit taakkununngalu aaqqiissutaasinnaasumik nassaarniarneq ilinniassavaat, Ungdommens Røde Korsimi nunarsuarmut tamarmut piumassuseqqortunermullu pisortaq, Kara Djurshuus oqarpoq.

Nunatsinni inuusuttut hunnorujut tungaannoortut allanut ikiuinissamut sakkussaminnik ilinnialersinnissaat pilersaarummi siunertaavoq.

Kara Djurshuus naapertorlugu inuusuttut akornanni nammineq kajumissutsimut kulturimik pilersitsinissamut tunngavoq.

Tamatumani kalaallit inuusuttaasa inuusuttut unammillissutigisartagaannik imminnut napatissinnaanerulersinneqassapput.

Taannami tarnikkut atuarfimmiluunniit ajornartorsiutinik akiuisinnaanermut ikiorsiissutaassaaq.

Assersuutigalugu nunatsinni inuusuttorparujussuit meeqqat atuarfianni misilitsinnermi angusinngitsoortarput.

Amerlasuut ilinniaqqiffinni aallartinneq ajorput.

- Taamaammat ilinniarnerup tungaani unammillissutissarpassuit inuuniarnikkut unammillissutillu ataqatigiipput. Taamaammat inuuniarnikkut allannguiniarnermi ilinniartitaanermi allannguiniarpugut, Kara Djurshuus oqarpoq.

Ungdommens Røde Kors ukiut tallimat matuma siorna nunatsinniilerpoq, peqatigiiffillu allannguiniarnermi iluatsitsivoq:

- Ilaatigut klubbinik, inuusuttut ilinniagassanik ikiortissarsiorfigisinnaasaannik tarnikkulluunniit ajornartorsiutinut tunngatillugu ikiortissarsiffigisinnaasaannik aallartitaqarpugut, Kara Djurshuus oqarpoq.

Operation Dagsværk ukiut tamaana novembarimi pisarpoq.

Qaammammi tassani ilinniarnertuunngorniarfinni inuusuttullu ilinniarfiini allani atuartut ullormi ataatsimi sulisarput akissarsiassartillu Operation Dagsværkimut tunniuttarlugu.

/ritzau/