Ombudsmandip nalunaarutaa
Sulifeqarfiit ombudsmandimut maalaarutaanerpaat ilaat tassa Ini A/S, ombudsmandip nalunaarutaani inatsisartunut ullumi saqqummiunneqartussami atuarneqarsinnaavoq.
Inatsisartut ombudsmandiata Vera Lethip ukioq kingulleq suliaanit 131-nit Ini pillugu maalaarutit 26-usimapput, suliat tamarmik 20%-eralugit.
Taamalu maalaarutigineqarnerpaat Ini pingajoraat. Kommunit Namminersornerullutillu Oqartussat kisimik amerlanerusunik maalaarutaasimapput.
Inimut naammagittaalliutit assigiinngeqaat, inissamik innersuussunermit, ineqarnermut tapiissutinut, ineqarnermut akiligassanut initaarniarlunilu utaqqinermut.
Inatsisartut inatsiseqarnermut ataatsimiititaliaata siulittaasua, Ane Hansen, IA, oqarpoq ombudsmandip nalunaarutaa inatsisliornermi atortussat pingaartut ilagigaat, tassani tikkuartorneqarsinnaasarmata inatsiseqarnikkut allannguuteqarsinnaasutut qimerloortariaqakkat, inatsiseqarnermulli ataatsimiititaliap nalunaarusiaq siullermeerluni isumaliutissiissutigisimanngilaa ukioq manna tusaatissaannartut nalunaarusiaq inatsisartunut apuutassaammat immikkullu aalajangiiffigisassaanani, Ane Hansen oqarpoq.
