Ombudsmandip maalaarut pilertortumik suliareqquaa

Aatsitassat pillugit naalakkersuisoqarfik kinguartitseqqusivoq, taamaaginnarsinnaanngilarli, Ombudsmand Vera Leth ullumi oqarpoq.

Upalungaarsimanermut pilersaarutit pillugit pisortanit paasitinneqarnissamik Greenpeacep aatsitassanut pisortaqarfimmut kissaataata itigartitsissutaaasimanera pillugu Nunatsinni Inatsisartut ombudsmandia suliani ingerlatileruttorpaa.

Ombudsmandip juunip aqqarnani allaffigineqarami suliaq aallartippaa. Ombudsmandili ajornartorsiuteqarpoq. Tassami pisortaqarfik, allanik tuaviuussassanik suliassaqarneq aasaaneranilu sulinngiffeqartoqarnera tunngavilersuusiullugu suliap unikaallatsinneqarnissaanik kissaateqarsimavoq. Suliassarli una suliassanut allanut sanilliullugu minnerutinneqassanngitsoq, ombudsmand Vera Leth oqarpoq.

- Taamaattumik qinnuiginikuuakka pilertornerpaamik, qaqugulu akissuteqarsinnaanissartik naatsorsuutigineqassanersoq erseqqissalaaqqullugu, kisianni saaffiginnissutiga suli akinikuunngilaat, Vera Leth oqarpoq.

Vera Lethip oqaatigaa, Greenpeacekkut allagaatinik paasitinneqarumallutik Aatsitassanut Ikummatissanullu  Pisortaqarfimmut qinnuteqaataat itigartinneqarnerat pillugu maalaarutaat pilertortumik suliarineqassasoq. Ombudsmandeqarfimmiilli allagaqaat Aatsitassanut Ikummatissanullu Pisortaqarfimmiit suli akineqanngitsoq Vera Lethip oqaatigaa.

Qinnuteqaatip tusarniaanertaa pisortaqarfimminngaanniit akineqanngippat naggataatigut ombudsmandip periarfissai arlaqarput. Siullermik Naalakkersuisoq Ove Karl Berthelsen  saaffigineqarsinnaavoq, kisiannilu suli akineqanngikkuni suliaq ombudsmandip suliarisinnaajunnaarsinnaavaa:

- Imaluunniit akinngiinnaavippata aamma periarfissaavoq Naalakkersuisunut Inatsisartunullu nalunaarutigalugu suliaq suliarisinnaajunnaariga akissuteqanngimmata, Vera Leth oqarpoq.
Kisianni Vera Lethip ilimaginngilaa aatsitassanut pisortaqarfiup taamatut pisoqassanngitsoq, maannakkummi pisortaqarfimmiit akineqajaarnissani ilimagaa. Kisiannili qanoq sivisutigisumik suliap aalajangerneqarnissaa kisimi apeqqutaalissaaq:

- Akissutaa apeqqutaatilluinnarlugu aaliangiussavaa qanoq sukkatigisumik una naammagittaalliuut suliarisinnaanerlugu, Vera Leth oqarpoq.