Ombudsmandi Greenpeace pillugu tapersiillunilu isorinnippoq
Aammattaaq aalajangiiffigineqarput, misiliilluni qillerinermi paasiniaaqqissaarnerit inerneri aamma Cairn Energyp Namminersorlutik Oqartussanut qularnaveeqqutitut piumasaqaataannut tunngasut allagaatit, Greenpeacemit piumaneqarsimagaluartut Aatsitassaqarnermulli Qullersaqarfiup taamani itigartitsissutisai.
Allagaatinik paasissutissanik pissarsiniarnermi itigartitsisimaneq pissusissamisoortoq nalunaarusiami 188-inik quppernilimmi, inatsisilerinermullu tunngasunik paasiuminaassinnaasunillu imalimmi naqissuserneqarpoq. Aammattaarli naqissuserneqarluni suliaq pillugu Aatsitassanut Qullersaqarfiup suleriusaa isornartoqarsimasoq.
Isornartorsiorneqartut ilagaat, oqartussaqarfiit inuiaqatigiinnut ammasuunissaannut inatsisip kukkusumik atorneqarsimanera, tunngavilersuutit amigarneri, uuliasioqatigiiffiit tatigeqatigiinnissaannut neriorsuutit kukkusut amerlavallaat aammalu suliap sivisuupilussuarmik ingerlanneqarsimanera isornartorsiorneqarluni.
Oqartussaqarfiit inuiaqatigiinnut ammasuunissaannut inatsisip, Aatsitassanut Qullersaqarfiup malissimanngikkaa, Ombudsmandip Aatsitassanut Qulersaqarfimmi atorfillit ilaannut naveersissutigaattaaq, oqarluni inatsisip iluamik malinneqarsimannginnera aammalu suliaq piffissap killiliussap iluani naammassineqarsimanngimmat isornartoqartillugu.
Aammattaaq Aatsitassanut Qullersaqarfiup qillerinissamut akuersissuteqartunut isertuussanik annertunerusumik paasissutissiisussaanngitsoq aammalu tamanna inatsisitigut toqqammavissaqannginnerarlugu, ombudsmandi oqarpoq.
Nalunaarusiami inerniliussaq tassaavoq, Aatsitassunut Qullersaqarfiup suliaq eqqortumik maanna suliarisariaqaraa.
