Ombudsmand: Naalakkersuisut tv-kkut saqqummiussat inerteqqutigisinnaanngilaat

Politikikkut isummersuutit tv-kkut takutinneqartartut Naalakkersuisunit peersinneqarsinnaanngillat. Ombudsmandip aalajangiinermini tamanna attappaa.
Qaleralinnik aalisarneq pillugu filmeeraliaq KNR-imit februaarimi peerneqarpoq. Suliarlu maanna ombudsmadimit misissorneqareerpoq.
juunip 25-at 2021 12:09

Filmeeraq naatsuliaq KNR-ikkut takutinneqartoq uani pineqarpoq, taannalu politikikkut isummernerummat KNR-ikkut takutinneqarsimanera unioqqutitsinerusoq, Ilinniartitaanermut, kultureqarnermut, ilageeqarnermullu naalakkersuisoqarfiup nalilerpaa.

Naalakkersuisulli inatsit taanna aallaavigalugu filmeeraliaq inerteqqutigisinnaanngilaat.

Ombudsmandi taama oqarpoq.

Taassuma Suliniaqatigiiffiup Ocean North Greenlandip filmeeraliaa innuttaasunit naammagittaalliuutigineqarneranut suliaq misissoreerlugu taama aalajangiivoq.

Ocean North Greenlandimi pisortap, Søren Stach Nielsenip aalajangiineq nuannaarutigaa.

- Assorujussuaq nuannaarutigivarput.

Soormita?

- Tassa tamatta periarfissinneqarpugut Kalaallit Nunaata Radioani oqallissaarusiarput saqqummiussinnaallugu.

Qalerallit politkkersuutaasut

Filmi naatsuliaq KNR-ip innuttaasunik paasissutissiinermut saqqummiussisarfianit suli peerneqanngitsoq takutinneqartarpoq.

Nunatsinni aalisarneq filmeeraliami aallaaviungaatsiarpoq, pingaartumik qaleralinnik.

Filmimi ilaatigut ima oqartoqarpoq: “Nunatsinni sineriammi qaleralinnik ingerlatsineq ajutooriaannartut isikkoqarpoq”.

Tamaammallu unammillernartut oqallisigineqartariaqartut, filmeeqqami aamma oqaatigineqarpoq.

Tassalu biologit pisassiissutissatut innersuussutaat malunnartumik qaangerneqartarneri aalisarnermullu akuersissutit amerlavallaarneri uani tikkuartorneqarput.

Politikikkullu isummarnertut Ilinniartitaanermut, kultureqarnermut ilageeqarnermullu naalakkersuisoqarfiup nalilermagu, KNR-ip peerpaa.

Søren Stach Nielsenilli oqallissaarutaanerarpaa:

- Tassami oqallissaarutaavoq. Imatut oqarsinnaavunga NGO-lluni soorunami isumaqarpugut, aamma anguniagaqarpugut imaluunniit oqallissaarummik saqqummiussassaqarpugut.

Aalajangiineq eqqartussagaaq

Ombudsmandimiit aalajangiunneqartut KNR-ip naalakkersuisoqarfik peqatigalugu oqallisiginiarlugit, KNR-imi pisortaagallartup oqaatigaa.

Ombudmandimiit mailisigatta soorunami piaartumik naalakkersuisoqarfitsinnut saaffiginnippugut, una imatut aalajangerneqarpoq taava qanoq iliornissarput eqqartueqatigiissutigissavarput.

Taava KNR-imi saqqummiunneqartartut politikkumut tunngassuteqartunut ammaanneqarpat?

Naamik taamatut oqarusunngilanga. Taanna utaqqimaarusunneruarput, naalakkersuisoqarfillu eqqartussajunnarsivaput qanoq aalajangerneqassanersoq.

Taamatut pisoqareerneranit KNR-imi saqqummiusseriaatsit allanngortinneqarnerlutik?

Naamik allannguisoqanngilaq aamma allannguisoqassanngila. Una utaqqimaalaariarlugu naalakkersuisoqarfimmiit oqaloqatiginninnissaq, KNR-imi pisrotaagallartoq, Anna Heilmann taama oqarpoq.

Ocean North Greenlandip filmeeraliaani politikikkut isummernertaqarnersoq ombudsmandip naliliiffiginngilaa.

Filmeeraliarli KNR-ikkut saqqummiunneqarsinnaanera inerteqqutaanngitsoq taamaallaat oqaaseqarfigisinnaanerarpaa.