Ombudsmand: KNR-imi kukkusoqarsimavoq

KNR sipaarniuteqarnermut atatillugu inatsisini piumasarineqartutut tusarniaaqqaarnani, soraarsitsinermullu amigarluinnartumik tunngavilersuilluni soraarsitsisimanera Ombudsmandimit isornartorujussuartut isigineqarpoq. Sooq sulisoq taannarpiaq soraarsinneqarnersoq qanorlu annertutigisumik tusagassiorfimmut taanna sipaarutaassanersoq KNR-imit nassuiarneqarsimanngilaq.

Taamaalilluni unneqqarissumik pissusissarlu eqqorlugu aalajangernissamut toqqammavissaq toqqammavissaaruttoq, Ombudsmandimit naqissuserneqarpoq.

Tamatuma kingornatigut sulisumik soraarsitsinermut atatillugu kukkusoqarsimanera KNR-imit utoqqatsissutigineqarpoq, neriorsuutigineqarlunilu siunissami suliani taamaattuni pitsaanerusumik ingerlatsisarnissaq.

Tamatumunnga peqatigitillugu KNR-ip Ombudsmandimut  nalunaarutigaa, sulisunik soraarsitsinermut suliaq nanginneqartoq tamannalu sulisorisimasamut aningaasanik taarsiissuteqarnermik kinguneqartoq.