Omar al-Bashir tigusareqquaat

Sudanip præsidentiata Omar Hassan al-Bashirip, Sudanip immikkoortuani Darfurimi naalakkersuisut sakkutuuisa pikitsitsiniallu sorsuunneranni pinerluuteqarsimasutut pisuutinneqarluni tigusarineqarnissaa, nunat tamat eqqartuussiviata piumasarissagaa ilimagineqarpoq.
Allattoq Mads Lynge
juulip 14-at 2008 07:20

Tamaani illuatungeriit akersuunneranni inuit 300.000-it toqutaasimanissaat, Naalagaaffiit Peqatigiit oqaatigaat.

Liberiap præsidentia Charles Taylor 2003-mi tamatuma assinganik pineqaatissinneqarmat aatsaat taamatut assingusumik piumasaqartoqarpoq.

Omar al-Bashirip inuiannik toqoraasimasutut nunarsuarmioqataasunullu pinerluuteqarsimasutut unnerluutigineqarnissaa, Naalagaaffiit Peqatigiit oqaatigaat.

Al-Bashirip tigusarineqarnissaa nalunaarutigineqarmat inuit tuusintit missaat Sudanip illoqarfiisa pingaarnersaanni Khartoumimi akerliussutsiminnik takutitsipput. Taama pisoqarnerata nalaani Omar al-Bashirip tigusarinneqqusissut pillugu naalakkersuisuni ataatsimeeqatigai.

Akerliussutsimik takutitsineq Sudanip naalakkersuisuinit aaqqissuuneqartoq patsisaalluni illoqarfiit pingaarnersaanni angallanneq unitsinneqaraluarpoq.

Inuit assigiinngitsut Darfurimi toqoraasimanersut, pinngitsaaliillutillu arnerisarsimanersut, ujajaasimanersullu misissuiffigineqassasoq, Naalagaaffiit Peqatigiit isumannaallisaaniaqatigiivi 2005-imi aalajangiipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq