OLT-mik isumaqatigiissut nukingisaarutigaat
Nutarterneqarnissaa Kommuneqarfik Sermersuumit naalakkersuisunut nukingisaarutigineqarpoq. Isumaqatigiissut nutarterneqanngippat Paamiuni raajanik tunisassiorneq matuneqarsinnaavoq, taamaammat Kommuneqarfik Sermersuumi borgmesteri Asii Chemnitz Narup, aamma inuussutissarsiutinut ataatsimiititaliap siulittaasua Ove Karl Berthelsen Namminersornerullutik Oqartussani nunanut allanut pisortaqarfimmut saaffiginnissuteqarput.
Tunisassianut assigiinngitsunut akitsuuteqartitsinnginnissaq pillugu OLT-mik isumaqatigiissutip sivitsorneqannginnera pissutigalugu Paamiuni raajanik tunisassiornerup annikilleriarujussuarnera kinguneraa. Royal Greenland akitsuutinik akiliissappat tunisassiorneq akisuallaalissaaq, Borgmester Asii Chemnitz Narup, Ove Karl Berthtelsenilu allapput.
Royal Greenlandip aamma Kommuneqarfik Sermersuup akornanni ataatsimiinnermi saqqummerpoq, Royal Greenlandip Paamiuni raajanik tunisassiuinnarnissaq kissaatigigaa. Isumaqatigiissut taanna sivitsorneqarsimanngilaq Paamiunilu tunisassiorfimmi raajanik tunisassiornermut sunniuteqarluni, Asii Chemnitz Narup Ove Karl Berthelsenilu nunanut allanut pisortaqarfimmut allakkaminni allapput.
