OLT-mi ilaasortat ataatsimiinnerat naammassivoq

EU-p nunallu nunasiaataasimasut OLT-mut ilaasortat ulluni sisamani Nuummi ataatsimiinnerat ippassaq naavoq.

OLT-mi ilaasortat EU kommissionimut saaffiginnissuteqarput. EU-p ineriartortitsinermut aningaasaaliissutigisartagaanut karsimut ajornannginnerusumik qinnuteqaateqarsinnaanissaq ujartorneqarluni.

Nunat EU-mi ilaasortat ukiunut arfinilikkaartumik EU-p Ineriartortitsinermut Aningaasaateqarfianut 1,5 milliardi koruunit missaannik aningaasaliissuteqartarput.

Aningaasat nunap ingerlanneqarneranut atortulersuutinut, umiarsualiveqarfinnut imaluunniit eqqakkanik suliarinniisarnermut atorneqartarlutik.

Aningaasaliinissamilli akuersissutiginninnermiit tunniunneqarnissaata tungaanut piffissaq sivisuallaarsorineqarpoq:

- Tamanna ajornartorsiuterujussuuvoq, EU kommissionillu aaqqittariaqarpaa. Tamanna qulakkeerniarlugu Kommissioni sulisitsisariaqarpoq, ineriartortitsinernummi aningaasaliissutaaniartut siunertaannut atorneqartariaqarput, Namminersornerullutik Oqartussat tusagassiuutinut nalunaarutaanni taama allassimavoq.