Olsvig Enoksenillu Siumukkormiut akuliuffigerusunngilaat
Naalakkersuisuneeqataa Partii Naleqqami siulittaasoq, Hans Enoksen, Siumumi aaqqiagiinnginneq Naalakkersuisoqatigiinnut nukillaarsaataanerarpaa.
Siumup siulittaasuata partiimillu pilersitseqataasimasup tamat tutsaanni oqqannerat pillugu partiit naalakkersuisoqatigiinni peqataasut taama qisuariaateqarput.
AAMMA ATUARUK Naalakkersuisoqatigiit tunuliaquteqarpat imaluunniit naamik?
- Taamatut ingerlaneq aamma uagutsinnut qatsunnarsivoq.
Hans Enoksen Naalakkersuisut siulittaasuata, Kim Kielsenip, Inatsisartullu siulittaasuata, Lars-Emil Johansenip, tamarmik Siumumi ilaasortaasut, ammasumik assortuunnerat pillugu taama oqarpoq.
Taamatulli tamat tutsaanni assortuunnermut Lars-Emil Johansen akisussaatippaa, Hans Enoksen oqarpoq.
AAMMA ATUARUK Lars-Emil Johansenip isornartorsiuinera pissusissamisuunngilaq
- Lars-Emili pisorpassuarnut amerlasuunut ikitsisarpoq, ilaatigut immaqa pissaanermik arsaarneqarsimasutut misigisimaleraangami taava ajorsartitsisorisani saassuttarpai, uangalu arlaleriarlunga taanna misigisarnikooqaara.
Isumaginninnermut aalisarnermullu naalakkersuisoqarfiit Siumup tigummiinnarsimasariaqaraluarai, Lars-Emil Johansen aviisimut Sermitsiamut sapaatip akunnerata siuliani oqarpoq.
Nuuk TV-mullu nangilluni aamma oqarpoq, isumaginninnermut naalakkersuisoqarfik, Siumup pimoorussilluni suliniuteqarfigisimasaa, Naalakkersuisoqataasut pinngitsooratik piumasaqaatigisimanngisaat, Kim Kielsenip tunniussimavaa.
AAMMA ATUARUK Lars-Emilip partiimi siulittaasua isornartorsiorpaa
- Tamanna sakkortunerpaamik utertikkusuppara. Inuit Ataqatigiinniit isumaginninnermut suliassamut akisussaaffik taannarpiaq tigujumasimavarput, Inuit Ataqatigiit siulittaasuat, isumaginninnermullu naalakkersuisoq, Sara Olsvig, oqarpoq.
Sara Olsvig Naalakersuisoqatimik partiianni susoqarneranut akuliukkumanngilaq. Inatsisartulli siulittaasuata Inatsisartut aalajangersagaannik apeqqusersuinerna pillugu ersarissumik mianerisoqquaa:
- Inatsisartut qinersinikkut toqqagaat suliakkiissutigisaallu Inatsisartut siulittaasuannit soorunami ataqqineqartariaqarput.
Siumumi assortuuneq Naalakkersuisoqatigiinnut politikkikkut suliniarnermi toqqissisimananngitsoq, Hans Enoksen isumaqarpoq:
- Nukiit iluamik atorneqaratik akerassarsiornermut atuleraangatsigit uagutsinnut nukillaarsarujussuartarpugut.
