Olsvig Canadamiittoq Issittumit tamarmit suleqatini peqatigalugit
- Ukioq manna septembarimi ataatsimeersualerutta eqqartugassagut ataatsimiinnermi aalajangiuppavut. Nuannaarutigeqaara Issittumi naalakkersueriaatsit aalajangeeriaatsillu, aamma nunat ataqatigiinnermut attaveqarfii isumannaatsut ukkataralugit ilaatigut ataatsimiissutigissagatsigik”, Sara Olsvig oqarpoq.
Nunat issittut inatsisartuisa ataatsimiititaliaat ukioq allortarlugu ataatsimeersuartarpoq, tassanilu nunani Issittuni naalakkersuisuinut innersuutit arlallit suliarineqartarput. Ottawami ataatsimiinnermi aalajangiunneqarpoq ataatsimeersuarnerup tulliani eqqartugassat tassaassasut, nunat ataqatigiinnermut attaveqarfii isumannaatsut, naalakkersueriaatsit assigiinngitsut aalajangiisarnernullu periaatsit, avannaarsuani aningaasaqarnerup siuarsarnera pisuussutsit akisussaassuseqartumik ineriartortinnerisigut aamma piginnaassuseqarnernik ineriartuineq, kiisalu avatangiisini unamminartut.
- Whitehorsemi ukiaru ataatsimiinnissarput qilanaareqaara. Ataatsimiititaliap innersuussutai tamatigut annertuumik sunniuteqartarput, pitsaasumillu suliaqarnissarput, pingaartumik ataatsimeersuarnerup piareersarnerani ingerlaneranilu, uannut pingaaruteqarpoq, Sara Olsvig ukiaru 2014-imi ataatsimeersuarnissaq pillugu oqarpoq.
