Olga P. Berthelsen: Erninersiutit qaffanneqartariaqarput

Ilinniagaqarsimanngitsut, suliffeqanngitsut ilinniartullu tassaapput erninerup kingorna sulinngiffeqarnermi atugaannik pitsanngorsaavigineqartussat. Taama isumaqarpoq Inuit Ataqatigiinneersoq, Olga Poulsen Berthelsen, Doris Jakobsenip, Siumut sinnerlugu maanna qineqqusaartup, siunnersutaanut tapersiilluni.
Allattoq Louise M. Kleemann
maajip 20-at 2009 07:41

Doris Jakobsenip siunnersuutigaa erninerup kingorna sulinngiffeqarneq sapaatip akunnerinut 50-inut sivitsorneqassasoq, anaananngortup ataatanngortullu assigiikannersumik sulinngiffeqartarnissaat agguataarluarneqassasoq aamma siunnersuutigaluguttaaq. Doris Jakobsen isumaqarpoq meeqqamut angajoqqaanngortunullu sivisunerusumik imminut najorsinnaaneq peqqinnarnerpaasoq, tamannalu Olga Poulsen Berthelsenip isumaqatigilluinnarpaa.

Olga Poulsen Berthelsenilli ilutigalugu tikkuarpaa ilinniagaqarsimalluni meerartaarneq ilinniagaqarsimanngitsumiit aamma ilinniartumiit meerartaartumiit atugarissaarnarnerujussuusoq.

- Ilinniagaqarsimalluni meerartaaraanni erninerup kingorna qaammammut aningaasarsiat pigiinnarlugit sulinngiffeqarsinnaatitaaffiuvoq, ilinniarsimasuunngikkuilli erninerup kingorna sulinngiffeqarninni 4-5.000 koruunit taamaallaat pisinnaavatit, naak aningaasartuutit assigiikkaluartut.

Taamaammat Olga Poulsen Berthelsen isumaqarpoq, erninermi sulinngiffeqartarnerup, ukiualunnguit matuma siorna sivitsorneqartup, allanngortinnissaaninngaaniit pingaarnerusoq, erninersiutit ilinniagaqarsimanngitsunut ilinniartunullu qaffaaffigigaanni.

Aningaasat sumit aaneqarsinnaanerinut tunngatillugu Olga Poulsen Berthelsenip siunnersuutigaa inunnik isumassuinermut tunngatillugu naatsorsuutitigut Aningaasanut Inatsimmi atunngitsuugaqartuaannaramik aningaasat tassanngaanniit aaneqarsinnaasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq