Ole Spiermann: Naalakkersuisoqarfiit suleqatigiilluarnerusinnaapput

- Efterskoli pillugu suliami naalakkersuisoqarfiit marluk akornanni suleqatigiilluartoqarsimanngitsoq malunnarpoq, Ole Spiermann oqarpoq:

- Ilassutitut aningaasaliissutinik qinnuteqaateqarniarnermi periaatsit misissorneqartariaqartut isumaqarpunga, naalakkersuisoqarfiilli ilaanni taamaaliortoqareersoq qularutiginngilara, periaatsilli sukumiinerusumik misissorneqartariaqarput, Ole Spiermann oqarpoq, nangillunilu:

- Ilassutitut aningaasaliissutinik qinnuteqaateqarniarnermi malittarisassat sakkortunerulersinneqarnissaat periarfissaasariaqarsinnaavoq, naalakkersuisoqarfiillu akornanni suleqatigiilluarnerulersoqartariaqarluni, professori Radioaviisimut oqarpoq.

Qasigiannguit Efterskoliannut tunngatillugu suliami Aningaasaqarnermut naalakkersuisoqarfiup Kultureqarnermut ilinniartitaanermullu naalakkersuisoqarfiup akornanni aaqqiagiinngittoqarsimanera malunnartoq taassuma aamma oqaatigaa:

- Aningaasaqarnermut naalakkersuisoqarfimmi atorfillit Kultureqarnermut naalakkersuisoqarfimmiut suliaannik isorinnittut killisiuinermi malunnarpoq, aningaasaliinernut tunngasut matumani eqqarsaatigaakka. Naalakkersuisoqarfinnilu atorfillit allat Aningaasaqarnermut naalakkersuisoqarfimmik isorinnittut killisiuinermi aamma erserpoq, Qasigiannguani efterskoliliortoqannginnissaa Aningaasaqarnermut naalakkersuisoqarfimmi atorfillit kissaatigigaat, naalakkersuisoqarfinni allani atorfillit allatut isumaqartut killisiuinermi erserpoq, Ole Spiermann oqarpoq.

Taassuma aamma oqaatigaa naalakkersuisoqarfiit akornanni emailikkut attaveqaqatigiinnerit suleqatigiinnermut innarliisinnaasutut nalilerneqarsinnaasut.