Ole Rud: Kammalaasersorneq ajornartorsiutaavoq

Ole Rud oqarpoq, Kalaallit Nunaanni suliffeqarfinni, ingammik Namminersornerullutik Oqartussat suliffeqarfiutaanni siulersuisuinut ilaasortanngortinneqartartut eqqaassagaanni, kammalaatigiinneq partiinilu aalajangersimasuni ilaasortaaneq aallaavigalugit toqqaasarneq ersarilluinnartoq. Ilanngullugu Ole Rudip oqaatigaa kammalaatinik iluaqutissiiniartarneq Danmarkimi atugaatigisutut oqaatigineqarsinnaanersoq nalugaluarlugu, oqaatigisariaqarlugu Kalaallit Nunaanni sunniutai inuiaqatigiinnut ajornerusartut, tassungalu pissutaanerpaasoq Kalaallit Nunaanni suliffeqarfiit pisortanit pigineqartut amerlassusaat.

- Ajornartorsiummut aaqqiissutaasinnaasut ilagaat pisortat suliffeqarfiutaasa nammiersortunut tunineqarlutik ingerlanneqalernissaat, aammali pisuussutinik uumassusilinnik pisassiisarnermi naapertuilluarnerusumik akuersissutinik agguaasoqarsinnaanerata aqqutissiuunneqarnera. Ullumikkummi nunap pisuussutaanik inuup ataatsip agguaasinneqartarnera, taamaalillunilu kikkut aqagu milliuuneerinngussanerannik aalajangiisinnaanera qimattariaqarpoq. Pisassiisarnerni annerusumik kikkut qanoq piginnaassuseqarnerat, inuillu naligiinnerutillugit naapertuilluartumik pisassiisarneq eqqunneqartariaqaraluarpoq. Pisortammi suliffeqarfiutaannik namminersortut piginnittuutilerniaraanni aningaasarpassuit torneqartussaammata tamanna qanittukkut pisinnaanavianngilaq, Ole Rud oqarpoq.