OL periarfissaanngilaq

Taekwondortartut silarsuaanni marlunnik nunarsuarmi kattuffissuaqarpoq. Kalaallit Nunaata ilaasortaaffigisaa International Taekwondo Federationimik ateqarpoq. Kattuffik taanna OL-imi peqataatitaqarneq ajorpoq. Taamaakkaluartorli Kalaallit Nunaanni Taekwondortartut kattuffianni siulittaasoq, Kim Rosing, kattuffiup aappaanut nuukkusunngilaq.

- Ulluni kingullerni tusakkavut malillugit periarfissaqalissagaluarpugut OL-imut peqataanissatsinnut. Timersornertaata tungaatigut isumaqarpunga periarfissaqarluartoq, ujammimmi amerlasuut veteranit juniorillu pissartanngorniunneranni ujammit amerlasuut ulluni kingullerni pinnattaarereerpavut, taekwondortartut Kattuffianni siulittaasoq, Kim Rosing oqarpoq.

Nunarsuarmi pissartanngorniuuteqataasarnerminni kalaallit angusarissaartuartaramik imminnut tatigeqaat, aamma oqarpoq.

Kisianni Kalaallit Nunaanni Taekwondortartut International Taekwondo Federationimut ilaasortaapput. Kattuffik taanna International Olympiske Komite-mut ilaasortaanngilaq, taamaattumillu Kalaallit Nunaat taekwondo-mi OL-imut peqataatitaqarsinnaanngilaq. Kalaallit Nunaanni Taekwondo-tartut Kattuffiat kattuffissuit aappaannut World Taekwondo Federationimut ilaasortanngoraluaruni, OL-imut peqataatitaqarnissaminut periarfissaqalissagaluarpoq.

- Nalunngilara uku kattuffissuit ataatsimuulerumallutik imminnut oqaloqatigiittartut. Kisianni suli angusaqartoqanngilaq. Immaqa ataasimuuleqqissagaluarpata periarfissaqalissagaluarpugut kalaallit OL-imut peqataasinnaanissaannut - ataatsimuulersinnaassappatami OL-imut aatsaat peqataatitaqalersinnaassaagut.

Kim Rosingip oqaluttuaraa, oqaluttuarisaanikkut pissutsit peqqutigalugit International Taekwondo Federationimut ilaasortaalutik, naak tassani ilaasortaatillutik, naak OL-imut unammiarsinnaanngikkaluarlutik.

- Kalaallit Nunaanni taekwondop aallartinneraniit aallarniisoq International Taekwondo Federationimi tunuliaqutaralugu aallartinneraniit ilaasortaasimavoq. Taamaattumik Kalaallit Nunaat taekwondomik aallussinini aallartimmalli tassani ilaasortaasimavoq.

Kalaallit Nunaanni 3000-it sinnerlugit taekwondortartoqarpoq.