OL-p innera nunatsinnut aqqusaartillugu

Ukiut sisamat qaangiunnerit tamaasa Olympiade-p innera seqernup qinngorneranik ikinneqartarpoq.

Inneq tullianik ikinneqartussanngorpat Grækenlandimi ikinneqassaaq Vancouverimullu apuunneqartussaalluni.

Nunatsinni arpattartup tusaamaneqarluartup Kim Godtfredsenip kiisalu Mininnguaq Kleistip maanna siunnersuutigaat inneq nunanut avannarlermiunut aqqusaartinneqarpat nunatta nunarsuarmioqataanera taamaalilluni tusaamaneqalersinnaasoq.

- Siusinnerpaamik 2010-mi tamanna pisinnaagaluarpoq Kim Godtfredsen oqarpoq.

- Kalaallit Nunaat nunarsuarmioqataavoq, aamma nunarput nunarsuarmiunut ilaqutariissuarnut peqataavoq, taamaattumik nunatta takutinnissaa pingaartissimavarput, Kim Godtfredsen oqarpoq.

Taanna aamma erseqqissaavoq nunat avannarliit tassalu Savalimmiut, Islandi nunarpullu qanoq imminnut qanitsiginerisa takutinnissaat aamma pingaartikkitsik.

- 2010-mi olympiade ukiukkut ingerlanneqalerpat Vancouverimiittussaavoq taannalu nunatsinniit ungasinngilaq. Taamaattumik inneq Athenimiit aallartinneqarpat takorloorneqarsinnaavoq Kalaallit Nunaat aqqusaarlugu imaluunniit nunat avannarliit aqqusaarlugit ingerlaarsinnaasoq. Taamaattumik isuma taanna suliniutiginiarlugu aalajangersimavugut, oqarpoq.

Taanna aperaarput taamaaliornikkut suna anguneqarsinnaanersoq.

- Kalaallit Nunaat sorpassuartigut tusaamaneqalersinnaassaaq. Soorlu assersuutigalugu, nunarsuup pissusaata kiatsikkiartornera assut sammineqalernikuuvoq, tamatumunnga nunarput sukumiisumik misissuisarfittut isigineqalernikooqaaq. Soorlu nunarsuup kiatsikkiartorneranut atatillugu sukkanerujussuarmik misissuisoqarniaraanni taava Kalaallit Nunaanniit aallaaveqartoqarsinnaalluni, Kim Godtfredsen oqarpoq.

Kim Godtfredsen aamma oqarpoq, Mininnguaq Kleistilu marluullutik tamatuma pisortatigoortumik sulissutiginissaa qanittukkut pissasoq. Taannattaaq erseqqissaavoq Savalimmiormiut Islandimiullu isumassarsiamut tassunga isumaqataalluinnartut.