OL-Laila: Nuannersuaarpoq
Ukiuunerani OL 2018 Korea Kujallermi PyeongChangimi ammarnersiorneqaleruttorpoq.
Kalaalerlu sisorarluni freestylemik peqataasussaq Laila Friis-Salling ammarnersiornermi maanna najuuttoq KNR-imit oqaloqatigaarput. Ullorlu una pissanngataasimaqisoq qallimmat ulloq soorluuna sisuuginnartoq:
- Nuannersuaarpoq, sukkasoorujussuarmik ingerlapallappoq. Ilimagigaluarakku sivisunerusumik misigissallugu.
Martin Møllerip Laila Friis-Sallingillu OL-imut peqataanerat KNR-imit malinnaavigineqassapput:
11. feb - 30 km skiathlon, Martin Møller (Taamaatiinnarpoq)
16. feb - 15 km sukuutserneq, Martin Møller
19. feb - Halfpipe kval., Laila Friis-Salling
20. feb - Halfpipe finale, Laila Friis-Salling
24. feb - 50 km qangatut, Martin Møller
Pyeongchangimi OL-ertoqarnera februaarip ulluisa 9-annit 25-ata tungaannut pissaaq.
Laila Friis-Salling Korea Kujallermi OL-erfiusussamut pingasunngornermi unnukkut tikereersimasussaagaluarpoq.
Timmisartorli kinguaattoormat Frankrigimi utaqqisariaqarsimavoq, unammiffissaminulli Kalaallit Nunaata nalunaaqutaa malillugu unnuaq apuuppoq:
- Aatsaat ullumi tikikkatta misigisaq nuannersuaarnikuuvoq.
Unammigiartup attaveqaqatigiittarfimmi snapchatimi oqaatigaa nassatani Korea Kujallermut nassarsinnaasimanagit.
Laila Friis-Salling OL-imi sisorarluni freestylemi halfpipemik februaarip ulluisa 19-anni nalunaaqutaq unnukkut qulinut unammeqataasussaavoq.
Sisorarluni oqilaniuttartup Martin Møllerip unamminissamut siullermut, nuffasersimanera pissutaalluni, peqataanngiinnarnissani nalunaarutigereerpaa.
Unamminerillu sinnerini marlunni sukataarniarluni oqaatigaa.