OL-imi internet killilersorneqassanngilaq
- Qularutissaanngitsumik ajornartorsiutit tamatumunnga tunngasut qaangerneqareerput, maannalu aviisiliortut nunanit tamaneersut, siusinnerusukkut OL-eqartarnerisulli internetimik atuisinnaassapput, Gunilla Lindberg, nunat tamalaat OL-imut ataatsimiititaliaani siulittaasumut tulliusoq Norgimi aviisit ilaanni Aftenpostenimi taama issuarneqarpoq.
Pingasunngormat oqaatigineqaraluarpoq Kinamiut oqartussaasuisa aviisiliortut nittartakkanut assigiinngitsunut isersinnaanerinik mattussimagaat. Taamatut aalajangiineq misissorneqaqqissaarnermik isigineqarpoq, naak Kinap OL-eqartarnerisulli aviisiliortut killilersugaannginnissaat siusinnerusukkut neriorsuutigereeraluaraa.
Interneti pillugu ajornartorsiuteqalerneq ippassaq ataatsimiissutigineqaqattaarpoq. Ippassarlu unnukkut isumaqatigiissuteqartoqarpoq.
- Kinamiut OL-imik aaqqissuussisut, OL-ip nalaani internetimik atuinermut killilersuiniarnerit tamaasa atorunnaarsippaat, Gunilla Lindberg Aftenpostimut taama oqarsimasutut issuarneqarpoq.