Okalik Enoksen-ilu attaveqaateqarnikkut suleqatigiinnialerput

Kalaallit Nunaannit Nunavumilu Naalakkersuinikkut siuuttut, kujataani naapeqatigiinnerminni ilaatigut attaveqaateqarnikkut suleqatigiissutigisinnaasaminnik imminnut neqeroorfigipput.

Suleqatigiissutissatut ukiuni arlaqalersuni isumaqatigiissutaareersimagaluartut, angallannikkut periarfissalunneq pissutigalugu annertunerusumik timitalerneqartarsimanngitsut, soorlu kulturikkut paarlaasseqatigiittarnissat aamma inuussutissarsiornermut ilinniartitaanermullu tunngasut iluatsinnissaat siunertaralugu angallannikkut iluarsiisoqarnissaa pimoorullugu suliniutigineqassasoq isumaqatigiissutigineqarpoq, taassuma saniatigut attaveqarteqarnikkut misilittakkat illugiinnit aamma neqeroorutigineqarput.

Kalaallit Nunaata ukiuni 30-inngulersuni namminersorluni ingerlasimanera, ukiuni arfineq-pingasuni Nunavumi namminneq ingerlatsinerminni misilittakkatigut iluaqutigisimaqalugu, Paul Okalik oqarpoq, namminerlu aamma nunami isorartuumi imaaliallaannaq tikinneqarsinnaasanngitsumi najugaqarnertik aallaavigalugu ineriartortissimasaminnik neqeroorutissaqarput.

Soorlu oqareersunga, teknologimik ingerlatsinitsinni siuarsimanerulaarpugut. Tamatta avinngarusimasuni najugaqarpugut, uagullu ungasianiit nakorsiartitsinerit sumiiffinni mikinerusuni atugaraavut. Kalaallit Nunaata tassuuna siuarsaaniarnerani ikiuukkusunnerput neqeroorutigaarput, Nunavumi Naalakkersuisut siulittaasuat, Paul Okalik oqarpoq.

Suleqatigiissutiginiakkat ingerlateqqinnissaat anguniarlugu, atorfilittat ukiamut ataatsimeeqatigeeqqissapput, aappaagumullu Hans Enoksen Nunavumut aamma tikeraarsarneqarpoq.