Qaqortumi timmisartunut mittarfeqalernissaq inatsisartunut qineqqusaarnermi
Mittarfiliortoqassasoq partiit tamarmik qineqqusaarnermi oqaatigaat.
Tamassumali qanoq akilersorneqarneqarnissaanut aamma qaqugu sanaartorneqarnissaanut isummat assigiinngillat.
Randi Vestergaard Evaldsen Demokraatit sinnerlugit inatsisartunut qinigassanngortittoq Qaqortumi qineqqusaartoqarnerani oqarpoq, piviusut maannakkut isigineqartariartut tassalu Qaqortumi mittarfiliortoqassappat nunatta karsiata tamaat akilersinnaanngikkaa maannalu ukiut 30it mittarfiliortoqarnissamut utaqqisoqarsimasoq soorlu Atassutikkut taama oqartut Randi Vestergaar Evaldsen oqarpoq, - ukiut 30it utaqqisoqarsimassanngikkaluarpoq Qaqortumi mittarfiliornissamut akissaqartoqarsimasuuppat !, Randi Vestergaard Evaldsen Qaqortumi qineqqusaartoqarnerani taama oqarmat avaallarneqangaatsiarpoq.
Naalakkersuisoqatigiit Siumut Atassullu aningaasanut inatsimmut 2015-mut atuuttussamut Qaqortumi mittarfiliornissamut 371 millioner korunit immikkoortinneqassasut siunnersuutigineqarpoq.
Qaqortumi Tasiilamilu timmisartunut mittarfinnik 1199 meterisut takitigisunik mittarfiliortoqarnissaq Nuummi Ilulissanilu mittarfiit tallilaarlugit nunarput eqqortumik inerisarneqassasoq Kim Kielsenip qineqqusaarnermi oqaatigaa.
Mittarfiliortoqarnissamut nunatsinni akissaqalernissaq utaqqineqassasoq Inuit Ataqatigiit qinigassanngortitaannit Kelly Berthelsenimit oqaatigineqarpoq.
- Nunatta ilaani angerlarsimaffeqanngitsut qanoq amerlatiginersut qanittumi takutinneqarput, Kelly Berthelsen oqarpoq, - inuiaqatigiinni akisussaassusilimmik ingerlatsissagutta aningaasanik nassaarniartariaqarpugut atugarliornerpaanit aallernata, Kelly Berthelsen oqarpoq.
Partii Naleraq aamma partii Inuit partiinut allanut sanilliullugu allarluinnarmik siunnersuuteqarput
- Illoqarfinni arfinilinni suluusalinnut mittarfinnik ujaraaqqanik qallersukkanik 750 meterisut takitigisunik ataaseq 150 millioner koruuninik akeqartunik sanaartortoqarsinnaasoq, partii Naleraq sinnerlugu inatsisartunut qinigassanngorittoq Per Rosing-Petersen oqarpoq.
Partii Inuit assingusumik siunnersuuteqarput.
- Islandinimi misilittaagaareersut tassalu ujaraaqqanik qallersukkanik mittarfinnik aamma utaqqisarfinnik isumannaallissaanermut piumasaqaatinut naapertuuttut sananeqartarput taakkualu akisunngillat akilersinnaallutillu, taakkua uagut orniginartinneruagut, Partii inuit inatsisartunut qinigassanngortitaat Terto Ngiviu taama oqarpoq.
