Danmarkimi inatsit danskit nunatsinni oqartussaasuinut atuutsikkusukkaat
Danskit nunatsinni Savalimmiunilu oqartussaasui, soorlu assersuutigalugit Naalagaaffiup Sinniisoqarfia politiillu - pisortat ingerlatsinerat pillugu paasitinneqarsinnaatitaaneq pillugu inatsimmut Danmarkimi 2013-imi atuutilersinneqartumut ilaatinneqanngillat. Maannali ilanngunneqartariaqarput, Naalakkersuisut taama isumaqarput.
Pisortat ingerlatsinerat pillugu paasitinneqarsinnaatitaaneq pillugu inatsit akuersissutigineqarmat isornartorsiorneqartupilussuuvoq, pingaartumik Danmarkimi tusagassiorfinnit. Tusagassiortut allallu, allagaatinik ministerinut qanittumik attuumassutilinnik aamma ministerit aqutsisoqarfiillu akornanni allagaatinik paasitinneqarsinnaatitaanerannut malittarisassat sukateriffigineqarnerat ilaatigut tamatumunnga pissutaavoq.
Folketingip Inatsiseqarnermut ataatsimiititaliaa inatsit nalilersuiffigeqqinniarlugu maanna misissuileruttorpoq.
Inatsit Inatsisartunit akuersissutigineqassappat, danskit nunatsinni oqartussaasuinut atuutitsinneqalissaaq nunatsinnili oqartussaasunut atuutitsinneqassanani.
