Odensemut tikilluaritsi

Kalaallit Odensemut nuuttartut pitsaasumik tikilluaqquneqartariaqarput. Taamaammat Odensep Kommunea, Kalaallit Illuat suleqatigalugu, mappersagannguamik nutaamik, nunasisut inuiaqatigiinnut akuliunnissaannut tunngasumik imalimmik, saqqummersitsisimavoq, taannalu kalaallisut danskisullu allassimavoq.

Mappersakkamik taamaattumik Danmarkimi aatsaat saqqummersoqarpoq. Inunnik nalunaarsuisarfimmut saaffiginninniaraanni qanoq iliortoqassanersoq, akileraarutinut tunngasut, nakorsat kigutillu nakorsaat qanoq nassaarineqarsinnaanersut, meeraqaraannilu meeqqat atuariartortittarnissaannut tunngasut ajornanngitsunnguamik tamarmik nassaarineqarsinnaapput.

- Tikilluaqquneqarluaraanni ingerlariaqqinnissaq aamma ajornannginnerusarpoq, akuliunnissaq, inissarsinissaq, suliffissarsinissaq, naatsumik oqaatigalugu, Danmarkimi kalaallit akornanniinnaanngitsoq inissilluarnissaq pingaaruteqarpoq, taamaammat mappersakkap iluaqutaalluarnissaa neriuutigaarput, Odensep Kommunea Kalaallit Illuallu ataatsimoorlutik allapput.

Mappersakkap saniatigut kalaallit Odensemut nuuttut Inunnik isumaginnittoqarfimmut imaluunniit Kalaallit Illuannut oqaloqatiginnikkiartorsinnaanerannik neqeroorfigineqartassapput. Neqeroorutit makkuusinnaapput, inissarsiornissaq aamma oqaatsitigut pikkorissarnissaq. Ilinniagaqalernissamut suliffeqalernissamulluunniit kalaallit aamma neqeroorfigineqartarput.