Obamap uuliamik mingutsitsineq takuniarpaa
Obamap angalanini ullumi aallartittussaavaa, taamaalilluni nunap immikkoortuini naalagaaffiit Mississippi, Alabama aamma Florida uuliamik mingutsitsinerup aallartinneranit præsidentimit aatsaat tikeraarneqassapput.
Obamap Floridami unnuinissaa aatsaallu aqagu Washingtonimut uternissaa pilersaarutaavoq. Floridamiinnermini uuliamik mingutsitsineq pillugu USA tamakkerlugu, tv-kkut isiginnaarneqarsinnaasumik, unnugu oqalugiarniarpoq. Nutaarsiassaqartitsivimmi Reutersimi taama allaaserinnittoqarpoq.
Reutersimi aamma allaaserineqarpoq, præsidentip nunap ilaanut naalagaaffinnut kujasinnerusuniittunut tikeraarnera, ajornartorsiummut uuliasiorluni qillerivimmi Deepwater Horizonimi apriilip 20-anni qaartoortoqarneratigut aallartittumut, iliuuseqarsinnaaneranut misiligutaassasoq.
Taamanimiilli uulia annertoorujussuaq Mexicop Kangerliumanersuanut maqilerpoq, maannangaarlu naalagaaffiup oqaluttuarisaanerani aatsaat taamak annertutigisumik uuliamik mingutsitsisoqarluni.
Uulia qillerivimmit ruujorimit qaartoorfiusumit immap qaavanit 1.525 meterinik itissusilimmiittumit suli maqivoq. Uulia 6 millionit liiterit missaat ullut tamaasa imaanut maqisarpoq.
