Obamap præsidentinngornissaa nunarsuarmiut kissaatigaat
Amerikami præsidentimut marlunngorpat qinersisoqalerpat imaanngilaq nunarsuarmioqatigiit tamarmik qinerseqataassasut. Taamaattoqassagaluarpalli demokratit qinigassanngortitaannut, Barack Obamamut, tamanna assorsuaq iluaqutaassagaluarpoq. Taassumami amerikamiut qinersisartut kisiisa tiguaqqanngilai.
Allattoq Louise M. Kleemann
oktobarip 29-at 2008 11:06
Demokratip amerikamiunut tulliulluni præsidentiunissaa nunarsuarmi innuttaasut amerlanersaasa kissaatigaat. Unammillertumut, republikanerimut, John McCainimut, tapersersuineq annikitsuararsuuvoq. Isumasiuisitsisarfiup, DMA/Researchip, isumasiuisitsisarfiit allat peqatigalugit, nunani assigiinngitsuni 21-ni isumasiuisitsinerani kingullermi, tamanut saqqummiunneqaqqammersumi, tamanna takuneqarsinnaavoq.
Isumasiuisitsinerup inerneraa, nunarsuarmioqatigiit 65 procentii Obamamik tapersersuisut, McCainimik tapersersuisut taamaallaat 15 procentiusut.
Amerikamiut qinersisartut qanoq agguataassanersut marlunngorpat paasinarsiumaarpoq – aammami taakkuupput aalajangiisussat.
