Obamap oqalugiarnera tupigusuutigineqarpoq
Tamatumunngali taarsiullugu uuliamik maqisoorneq sila pillugu politikkimik ingerlatsinissamut atorpaa.
Præsident Obama isumalunnerminik isumagissaarerminiluunniit aammalu pissanganerminik noqitsisinnaasutut USA-mi naluneqanngilaq, tamannalu "No drama Obama"-mik atequseqaatigilersimallugu.
Amerikamiulli misigissuseqarnerat eqqarsaatigalugu ajunaarnersuarmi uuliamik maqisoornertut ittumi Obama immaqa naalagaaniarpaluppallaaluatsiarpoq. Taamatullu malunnaateqarnini inuiaqatigiinnut oqalugiarnermini annertunerulersippaa, tassami præsident Obamap ajornartoornermi siuttutut pimoorullugu iliuuseqarnissaa ilimagineqarsimagaluarmat.
- Tamanna iluatsinngilaa, oqaaseqartartoq siunnersuisartorlu misilittagaqarluartoq David Curving CNN-imut taama oqarpoq.
Præsident Obamap tamatumunnga taarsiullugu BP-kkormiut nuannarineqanngeqisut sammivai uuliasiortitseqatigiiffiullu ullut qassissunnguit ingerlaneranni ullormut uuliakup maqisup 90 procentiata katersorsinnaassammagu taanna tatigalugu.
- Obamalu pingaartitsiniartorujussuuvoq sivisoqisumillu Amerikamiut oqaluttuunniarlugit nukissiuutitigut allanngortiterinissamut maanna piffissanngortoq uulialu atorunnaarneqassasoq, naallu tamatumuuna ilumoorsinnaagaluarluni tamanna Amerikamiut maannakkorpiaq uuliamik ajutoornersuarmut pakatsisimanerannut kamassimanerannullu iluaqutaanngilaq. Tamannali illuatungaatigut Obamap misigissuseqarpalunngitsumik pingaartitsineranut uppernarsaataasinnaavoq.
Obama uuliasiortitseqatigiiffimmi BP-mi pisortanik ullumi ataatsimeeqateqassaaq, ilimagineqarlunilu BP-p taarsiissuteqartarnermi aningaasaateqarfimmut 150 mia. kr.-inik akiliuteqarnissaa Obamap piumasarissagaa.
