Obamap nersornaatisinera Castrop nuannaarutigaa

Nobelip nersunnaasiuttagaanik kikkut tunineqarnissaannik Norgemi aalajangiisartut nersualaarpai, taama Ritzau allaaserisaqarpoq.

Fidel Castrop pisoq amerikap ilorraap tungaanut aallarneranut takussutissaasoraa. Taamali oqarnermigut qanga amerikami politikkerisarsimasat uparuarniarnerugunarpai, Barack Obama kisiat nersualaarnagu.

Cubap præsidenterisimasaata aamma ilimagaa, Barack Obamap tuppallersaammik tunineqarnissaa aalajangiunneqarsimasoq, illoqarfigisaami Chigago 2016-imi OL-eqarfiunngitsuussaaq, naak Obamap allallu nuimasut tamaviaarlutik OL-ip Chicagomiinnissaa angorusukkaluaqigaat.

- Nersornaatisisussat kikkuunerinik aalajangiisartut isumaqatigiuaannarneq ajorpakka, uanili pisumi aalajangiineq nersualaagassaavoq, Fidel Castro, Cubami aviisersuarmi naalagaaffiup nakkutigisaani, allaaserinnippoq.

- Arlalissuit isumaqassagaluarput Barack Obamap maannamut suliai nersornaaserneqarnissamut naammanngitsut. Uagulli nersornaaserneqarnera nersornaataannaanani, aammali amerikami siornatigut præsidentiusarsimasut politikkerisimasaanut, ulorianarluinnartumut uparuaanertut isigerusunneruarput, Cubap præsidenterisimasaa allappoq.

Fidel Castrop allaaserisaata qulequtaraa, "Dollari naggasersorunarpoq".

Castro isumaqarpoq, amerikap aningaasaa dollari nunarsuarmi naleerukkiartuinnartoq.

Fidel Castro maanna 83-inik ukioqartoq 2008-mi præsidentitut tunuarpoq, atorfinilu qatanngutiminut Raul Castro-mut tunniullugu.