Obamap nersornaaserneqarnini tupaallaatigaa

Præsidentip ilaquttani nersualaarlugit aallarniuteqarpoq, nersornaasiussarsuaq pigaluarlugu nunamut atassuteqartittuaannarsimammanni.

- Ullaaq iterama taama ilimasussimanngikkaluarpunga, panigali aggerpoq oqarlunilu, ataata, Nobelip nersornaasiuttagaanik nersornaasigaavutit aamma qimmerput inuuissiorpoq.

Obama oqarpoq siornatigut nersornaammik pissarsisartut peqatigilissallugit imminut tulluartutut misigisimanani, taamaakkaluartorli nersornaat tigorusullugu.

- Nersornaat tigorusuppara iliuuseqarnissannut kajumissaatitut, ukiut 100-likkaat 21-ssaanni unammilligassat pakkersimaarnissaat pillugu naalagaaffinnut tamanut nalunaarutitut, taama Obama oqarpoq.

Steffen Gram DR-imeersoq oqarpoq:

- Siullermik quiasaariarluni taava ajukkutilerpoq kingornatigullu ilumoorsaarluni qujassuteqarluni, oqarlunilu, nersornaatip tunniunneqaratulli taamatut anersaaqarluni suliani ingerlateqqinniarlugu, tassalu demokratii, naligiimmik pisinnaatitaaneq sakkussakillisaanissarlu pillugit suliniarluni.

- USA-mimi iliuuseqarnerit qanoq ippat?

- Assigiinngeqaat, aammalu kingumut ersersitseqqillutik Washingtonimi politikkikkut imminut ajoqusersuiniarnerup qanoq annertutigissusianik, Republikanerilluunniit namminneerlutik pilluaqqusillutik oqarsinnaanngillat, oqarlutilli qularutiginagu Amerikamiut amerlaqisut suliffimminnik annaasaqarsimasut Obamap nersornaatisinera isumaqatiginngikkaat, taavalu aamma talerperliuniani qullersat oqarlutik, Olympiadep USA-mi pisinnaannginneranut naleqqiullugu tamanna suli nikanarsaataanerusoq, taavalu soorunami tassunga illersuisut oqarlutik, tamanna ataqqinaataasoq ajunngitsorlu, uatsinnik siuartitsisuuvoq, maannali tassa naammassisanik takutitsissasoq.