Obamap Danmark qimaasunut iliuuseqanngippallaarnerarpaa
Danmark aamma nunat allat USA-p Irakimi iligisai, Irakimi sorsunnerup kinguneranik qimaasunut iliuuseqanngippallaaqaat. Taama isumaqarpoq USA-mi præsidentimut qinigaarlaaq Barack Obama. DR-ip nittartagaani taama allaaserinnittoqarpoq.
Allattoq Louise M. Kleemann
Præsidentinngortussap nittartakkamini nunat Irakimi USA-mut tapersersuillutik sorsoqataasut, sorsunnerup kinguneranik qimaasunut iliuuseqanngippallaarneralugit isornartorsiorpai annerusumillu iliuuseqarnissaannik kajumissaarlugit.
USA aamma ilanngullugu isornartorsiorneqarpoq, tamatumani oqaatigineqarluni USA qimaasunik 7.000-inik aggeqqusisussaagaluarluni ikittuinnarnik tikisitsisimasoq.
Danmarkimi partit ilaata De Radikalit Obama ilumoornerarpaat – partilu isumaqarluni Danmark qimaasunik Irakimeersunik amerlanerusunik aggersitsisariaqaraluartoq.