Obamamik tapersersuiniarluni Clinton nalunaaruteqarpoq
- Senatori Barack Obama demokratit præsidentissaattut piukkunneqassappat tapersersorniarlugu qineqqusaarninni oqariartuutigaara, neriorsuutigalu eqquutsinniarpara, allakkat USA-mi tusagassiuutini saqqummersinneqarsimasuni Hillary Clintoni erseqqissaavoq.
Republikanerit qinigassanngortitaata John McCainip maanna immikkut sammineqartariaqalernera Clintonip oqaatigaa.
- McCainimik republikanerinillu isumaqatigiinngissuteqartarnera, Obamamik isumaqateqatigiinngissuteqartarninnut naleqqiullugu annertuneruvoq, Hillary Clinton oqarpoq.
Obamap aviisimut The New York Timesimut oqaasiisa isumaat allaanerungaanngillat, demokratit iluminni isumaqatigiinngissuteqarnerat aaqqiivigineqareersoq oqariartuutigalugu.
Clinton aamma Obama qanittukkut ataatsimeeqatigiissamaarput.