Obama USA-mi præsidentissatut piukkukkaat

USA-mi præsidentimik tullianik qinersinissamut Demokraatinit piukkunneqartup qernertormiunik siuaasaqartup senator Barack Obamap qineqqusaarnissi ullumi nalunaarutigaa.

Barack Obamap præsidentissatut qineqqusaarnissi naalagaaffeeqqap Illinoisip illoqarfiani Springfieldimi saqqummiuppaa. Illoqarfimmi tassanerpiaq USA-mi præsidentiusimasup Abraham Lincolnip qernertormiunik inussiaateqartarunnaarneq 1858-imi nalunaarutiginikuuaa.

Obama Afrikamit kingoqqisut kinguaavat, piukkunneqalerpoq USA-mi politikkikkut nutaaliorusunnini pissutigalugu.

Taamaattorli Barack Obama Afrikamit kingoqqisunit soqutigineqarpallaarani USA-mi pissaqarnerusunit nuannarineqarnerusoq, taamaalillunilu afrikamit kingoqqisunit soqutigineqalernissani sorsuutigisariaqassagaa oqaatigineqarpoq.

Barack Obamap Demokraatit sinnerlugit qineqagassanngorteqatigaa USA-mi præsidentiusimasup nulia Hillary Clinton, taassumalu angusaqarnerunissaa suli ilimagineqarpoq.