Obama ulluni marlunni Ruslandimiissaaq
USA-p præsidentiata Barack Obamap ulluni marlunni tikeraarnissani aallarnerlugu qanittukkut Moskvamut tikippoq, ilaatigut russit præsidentiat Dmitri Medvedev ataatsimeeqatigissallugu.
Allattoq Elisa Isaksen
Sakkussiorneq atomilu atorlugu sakkussiornerup nakkutigineqarnissaa, Iranimut tunngasut, Europami isumannaatsuunissaq Afghanistanilu pillugu oqaloqatigiinnissaq, præsidentit taakku marluk ulluni marlunni oqaluuserisassaannut ilaapput.
USA-p Ruslandillu akornanni pissutsit qiviaraanni, ukiuni kingullerni assigiinngissutsit isumaqatigiinngissutillu imaaginnavissimapput. Maannali nunat taakku marluullutik pitsaanerusumik attaveqatigiilernissartik kissaatigaat.
Barack Obamap Ruslandip ministeriunera, siornatigut præsidentiusoq Vladimir Putin aqagu naapittussaavaa.