Obama tusagassiortutut

BBC-ip nittartakkamini apeqqarissaarnerup ilaa ikkutereerpaa, Ritzau allappoq.

Obama Attenborough-lu præsidentip illorsuani naapipput silaannaallu pissusaata allanngoriartornera oqallisigaat.

- Suliatit sivisuumik malinnaavigisimavakka, Obamap Attenborough 89-inik ukioqaraluarluni suli uummarissoq oqarfigaa.

Obamallu aperaa ilumoornersoq ullutsinni avatangiiseq silaannaallu pissusaa aatsaat taama meeqqat soqutigtigineraat. Nangillunilu oqaluttuaralugu panimi silaannaap pissusaanik ilisimatusartut silaannaallu pissusaata allanngoriartornera qularinngikkaat.

- Pinngortitamik soqutigisaqanngitsumik meeqqamik naapitsinikuunngilanga, una assersuutigilara: Tallimanik ukiullip ujarak illuarlugu ataani soqarnersoq misissorpaa takusanilu assut soqutiginartillugit, Attenborough akivoq.

Obamap præsidentiunermini silaannaap allanngoriartorneranut akiuiniarneq pingaartissimavaa.

Decembarimi Parisimi Naalagaaffiit Peqatigiit silaannap pissusaa pillugu ataatsimeersuartitsilerpat nunat tamalaat akornanni gassit aniatinneqartut annikillisinneqarnissaannut isumaqatigiissusiortoqarnissaa angorusullugu, Obamap oqaatiginikuua.