Barack Obamap Donald Trump isornartorsiungaatsiaraa

USA-p præsidenterisimasaata Barack Obamap USA-p maanna præsidentiata Donald Trumpip coronavirusip akiorniarneqarneranik sulinera pikkugivallaanngilaa.

Obamap siuttuunerata nalaani sulisorisimasat akunnerup affaanik sivisutigisumik ataatsimiinnermi Obama Trump isornartorsiungaatsiarpaa.

Attaveqaatit aqqutigalugit USA-mi tallimanngornermi unnukkut ataatsimiittoqarpoq.

Donald Trumpip coronavirusip akiorniarneqarnerani aqutsinera naammaginanngilluinnartutut Obamap oqaatigigaa, ataatsimiinnermi peqataasut pingasut oqaatigaat.

Trump coronavirusip akiorniarneqarnerani aqutsinerlunnerarlugu Obama aatsaat taama sakkortutigisumik Trumpimik isornartorsiuisoq, CNN-ip, Trumpimik isornartorsiuisartup allaaseraa.

Barack Obama USA-mi demokratit sinnerlugit 2009-mit 2017-imi januaarip tungaanut præsidentiuvoq, Trumpilu republikanerit sinnerlugit præsidentinngorluni.

Nunani tamalaani ajornartoortoqartillugu aqutsilluarsinnaasumik pisariaqartitsisoqartoq, Obamap ataatsimiinnerup nalaani oqaatigaa.