Obama oqalugiallaqqilluinnartuuvoq
Taamaammat oqaatsit pillugit, periutsillu ileqquliussimasat pillugit immikkut ilisimasallit Obama oqaatsitigut immikkut piginnaanilittut nalilerpaat.
Suummitaava Obamap oqalugiartarnerata ilisarnaatigai?
- Oqalugiaatissaminik ilusilersuillaqqilluinnarpoq, itsarli silatoorsuit oqalugiaatsinik ilusilersuisarnerminnut malittarisartagaat naapertorlugit oqalugiusiortarluni. Malittarisassat tamakku ilagaat uteqattaarilaartarnissaq, soorlu oqaatiginiakkat assigiinngitsut assigiinnik pingasoqiusanik aallarniusersortarnissaat, oqaatsit pingajuat allaatittarlugu immikkuullarilluni maluginiarnartoq. Soorlu oqaluttuatoqqat taama oqaaseqatigiiliorneqartartut, Københavnip universitetiani periutsit ileqquliussimasat pillugit immikkut ilisimasalik, Christian Koch oqarpoq.
Obama aamma oqaluttuarisaanermi pisimasut ilanngussorlugit oqalugiusiorniartarpoq. Marlunngormat ajugaanersiorluni oqalugiarnermini arnaq qernertormioq 106-inik ukiulik eqqartorpaa. Soorunami utoqqaap taassuma eqqaaneqarnera killitsinnarsinnaavoq, arnalli taassuma eqqaanera oqaluttuarisaanermi pisimasunik eqqartuiniarluni aallarniutigissallugu tulluartuuvoq. Minnerunngitsumik qernertormiut amerikamiut oqaluttuarisaaneranni inissisimanerat eqqartussagaanni, Christian Koch oqarpoq.
Naggataatigut Christian Kochip danskit politikerii isornartorsiutallappai, oqarluni danskit politikeriisa oqalugiusiortarneq qaammaasaqarfiginngippallaaraat. Kalaallit Nunaanni politikerit immaqa aamma oqalugiusiullaqqinerusinnaagaluarput.?
