Obama mianersoqqusivoq
Amerikami aningaasarsiornikkut ineriartorneq pitsaavallaanngitsoq præsident Obamap nassuerutigaa.
Amerikami præsidentip New Orleansimi tikeraarnermigut anorersuarujussuup Katrinap pineraniit ukiut tallimanngornerat malunnartitsiniaqataaffigimmagu oqartoqarsinnaavoq Obama feeriareerluni anorersuup qiterisaanut utersimasoq. Aningaasarsiorneq neriuutigisaminngarnit ineriartorfiusimanngitsoq pineqarpoq. Sapaatit akunnerini kingullerni Amerikami aningaasarsiornermi kisitsisit annilaarnartuusut paasinarsivoq.
- Aningaasarsiorneq suli annertusiartorpoq, ilimagisaminngarnilli sukkaannerusumik ingerlalluni, Obama Amerikami tv-qarfimmit apeqqarissaarfigineqarluni oqarpoq.
Ukioq manna kvartalit aappaanni USA-mi aningaasarsiorneq 1,6 procentimik annertuseriarsimasoq takuneqarsinnaavoq, tamannali marloriaatingajammik annertuseriassasoq isumaqartoqarlunilu neriuttoqarsimagaluarluni. Præsidentilu oqarpoq Amerikami naalakkersuisut allatut ajornartumik avaanngunartunik aalajangiisariaqartut kinguaariillu maannakkut inuusut ajornakusoortumik aalajangiisariaqartut.
Aningaasaqarnikkut ineriartornerunissap pilersinnissaa siunertaralugu Obamap taarsigassarsiniarnissamut periarfissat suliffeqarfinnut mikinerusunut pitsaanerusut pilersinniarpai.
- Inatsisit pilersittariaqarpavut suliffeqarfinnut mikinerusunut taarsigassarsiniarnissamut iluaqutaasinnaasut aningaasaatinillu iluanaarutinit akileraarutit peerlugit, Obama oqarpoq.
Tamatumunnga peqatigitillugu mianersoqqussutigaa isumaqartoqassanngitsoq ajornartorsiutit pisariitsumik piaartumillu aaqqinneqarsinnaasut.
USA-mi nalinginnaasumik qinersinerit akornanni novembarip aappaanni qinersisoqassaaq. Tamatumani aningaasarsiorneq aammalu suliffissanik nutaanik pilersitsinissaq sammineqartut pingaarnerit ilagissagaat ilimagineqarluni. DR taama nutaarsiassaqartitsivoq.
