Obama kinaana
Tamatuma siornatigut Barack Obama politikeriuvoq Illinoisimeersoq ilisimaneqarpianngitsoq, ippassarli USA-mi præsidentissatut qinigaavoq.
Obamap politikeritut siuariartornera malunnartumik sukkatsippoq 2004-mi Demokratit ataatsimeersuarneranni inuunermi oqaluttuassartai saqqummiukkamigit. Afrikamiutut ateqarnera ajoqutaanngilaq akerlianilli alutorineqaannarluni. Taamanili 2004-mi oqalugiareerami assigiinngitsunit præsidentingorniarsinnasutut isigineqalerpoq. Afrikamiunilli siuaasaqarnera, qernertumik ameqarnera naalakkersuinermillu sulialittut nuimasutut misilittagakinnera pissutigalugu allanit nuimasunit sungiusimannillutik misigisartuunit nikaginiarneqartaqqaaraluarpoq. Præsidentinngorniunnermilu unammisaasa siulliit, parteeqataasa John Edwardsip Hillary Clintonillu Obama nikaginiaqqaaraluariarlugu ataqqinnilerlutik, nalunngisatsitut tamarmik ajorsartinneqarput. Obamap tapersersortissarsiornermini aningaasatigullu tapiisussarsiornermini alutorineqarluni qiimmaallatsitsinini ima atorluartigaa, allaat qineqqusaartoqartalermalli aningaasatigut inummut ataatsimut tapiissutigineqartut aatsaat taama amerlatigalutik. Obamap qineqqusaarnera ataatsikkut qulaaniit ataaniillu aqunneqartutut oqaatigineqarsinnaavoq, nuimasut assigiinngitsutigut ikiuummata, inuppassuillu namminneq piumassutsiminnik sorpassuartigut ikiuullutik. Tassalu unnuaq takuarput qernertormioq tuattoq, eqqumiitsumik atilik maanna Amerikami præsidentitut periarfississalugu piffissanngorsimasoq.
