Obama immiaarartortitsivoq

Immiaarartorluni isumaqatigiinniarnermut saassaagut. USA-p præsidentia Det Hvide Husimi saammaateqatigiissitsiniarluni immiaarallertariaqarsimavoq. Immiaarartoriaqqusaasulli marluinnaapput, tassalu politeeq qaamasumik amilik saammaateqatiginiagaalu qernertormioq kukkuluttornikkut naapertuilluanngitsuliornikkullu tigusaasoq.
Allattoq Najaaraq Egede
juulip 31-at 2009 10:53

Obamap naatsiivimmi ualinerani immiaarartornerinnaaneruneraraluaraa tusagassiortut assiliisartullu takkussimasut taamatoqqissaaq isiginngilaat.

Pisoq tassaannaagaluarpoq illumut tillinniarsorineqartumik tigusarinninneq, angulli tillinniaasorineqartoq matuersaaserfimminik ajornartorsiuteqarsimavoq. Taanna qernertortmiuuvoq politeerlu qaamasumik ameqarluni. Ammillu qalipaataanik immikkoortitsisoqarnerarlugu unnerluuttaaleraluaqaat.

Obamap politiit periarnerat sianiilliornerunerarlugu oqarmat pisoq USA-mi tamarmi tusaamaneqalertorpoq.

Ammip qalipaataa pillugu oqallinnersuarmik aallartitsivoq naggataagullu præsident Obamap akerleriit naatsiivimminut immiaarartoriaqqusariaqalerpai.

Immiaarartoqatigeereerlutik politeeq oqarpoq pisimasut pinagit siumut isiginiarlutik isumaqatigiillutik. Akerleriit imminnut utoqqatserfiginngillat, taamaattorli ullup qeqqasioqatigiillutik pisumut tunngasut eqqartoqqinniarlugit isumaqatigiipput.

Ammip qalipaataa pillugu oqallinneq tamaanga killeqarumaartoq Obamallu peqqissuseq pillugu allanngortiterinermini politikkini eqqartorneqarnerulerumaartoq neriuppoq.

Præsidentip tullersortaa Joe Biden aamma ataasitoqataavorooq. DR-imeersup Pernille Boesgaardip ilanngutassiaa Aqqalu Olsvigimit kalaallisuunngortinneqarluni atuarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq