Obama akillorinneruvoq
Tv-kkut akisaqattaanneranni USA-mi aningaasarsiornikkut ajornartorsiorneq nunanullu allanut tunngasut sammineqarput. Qineqqusaartullu marluusut sakkortuumik imminnut pissusilersorfigipput.
- Sorsunneq aallartimmat oqarputit sorsunneq ajornannginaarneqassasoq tassuugunnguarlu naammassineqassasoq, aamma sakkut akornuseerujussuarsinnaasut sumiinneri nalunngikkissi oqarputit. Tamatumani kukkuvutit. Annaassisutut tikilluaqqusaassasugut oqarputit. Tamatumani aamma kukkuvutit. Senatimut ilasortap Obamap Irakimi sorsunneq pillugu aperineqaramik præsidentinngorniunnermi unammisani John McCain
taama saassuppaa.
John McCainip oqallinnermi arlaleriarluni erseqqissarniarsaraa, nammineq nunanut allanut tunngasunik misilittagaqarnerulluni, Obamalu tassaanerarlugu tamatumunnga tunngasunik misilittagaqanngilluinnartoq.
- Barrack Obamap periaatsit aamma iliuusissanik pilersaarusiornerup assigiinngissutaat ilisimasaqarfiginngimmagit ernummatigaara, McCain ilaatigut oqarpoq.
TV-kkut akisaqattaannerat Amerikamiunit 90 miliuuninit isiginnaarneqarsimanissaa naatsorsuutigineqarpoq.
Oqallinnerup kingornatigut CBC News-ip isumasiuisitsinerani ersersinneqarpoq, qinersinissamut suli isummersimanngitsut akornanni Obama iluatsitsinerusimasoq. Isumasiorneqartut 500-uusut 39 procentii akipput, Obamap oqallinneq ajugaaffigigaa, 24 procentillu akillutik McCain ajugaasoq, isumasiorneqartullu 37 procentii akipput oqallinnermi ajugaasoqanngitsoq.
