Obama Afghanistan pillugu aalajangertariaqassaaq
Sakkutuut amerlanerusut aallartinneqassanersut imaluunniit nutaanik periusaqartoqalissanersoq apeqqutaalerpoq.
Nuna tamakkerlugu inatsisit qanoq ililluta malinneqarsinnaalersissavagut. Afghanistanimiut siunissaat qaamanerussappat qanoq ililluta nuna ineriartortunngortillugulu aningaasaqarnikkut siumukartilissavarput. Præsident Obamallu sillimaniarnermut siunnersortaa Jim Jones malillugu taakku tassaapput suliassat pingaarnerpaat. Sakkutuut qullersaata McCrystalip kissaatigisaatut sakkutuut amerlineqassanersut imaluunniit periutsit sakkutuunit atorneqartut allanngortinneqassanersut Obamap qanittukkut aalajangiiffigisariaqalersussaavaa. Pakistanillu qanittuani amerikamiut sakkutooqarfiinut Talibanit sakkortuumik saassussinerisa Obamap aalajangernissaa sakkortusisamik tativaat. Arfininngornermi saassussinermi amerikamiut sakkutuui arfineq-pingasut afghanistanimiullu sakkutuui marluk toqutaapput, Afghanistanimiullu politiit sillimaniarnermilu sullissisut 35-t missaanniittut sallunaveeqqutitut tigusarineqarlutik. Taakku siunissaat eqqoriarneqaannarsinnaavoq. Amerikamiut imminnuinnaq eqqarsaatigisuunerannik Afghanistanimiorpassuit oqartarnerat pisup aammaarluni takussusissavaa, taamalu iliorluni nuannarinnilersinneqarsinnaanngillat.
Talibanit akiorniaraanni sakkutuut 40.000-it saniatigut atorneqartariaqartut McCrystal isumaqarpoq.
Aalajangernissaq sioqqullugu periutsit nutaat inissinneqaqqaarnissaat Obamap siunniuteqqavaa. Nunami suliassat isumaginissaat, sillimaniarnikkut sulinerup annertusinissaa aammalu sillimaniarnikkut isumagisassat amerlanerit Afghanistanimiut sakkutuuinut tunniunneqarnissaat matumani siunertaavoq.
Taamaalilluni amerikamiut sakkutuui nunap immikkoortuinit avinngarusimasunit inukinnerusuniillu nuunneqarsinnaalissapput, tassalumiuna nunap kangisinnerusortaani sakkutooqarfinni taama pisoqaleruttortoq Talibanit sakkutuui arfininngormat saassussisut. Talibaniniit amerikamiunut kalerrisaarineq erseqqissoq. Talibanillumi siuttuisa ilaat ullumi oqarpoq, sakkutuunik amerlanerusunik aggersitsippata taava sorsuttartugut amerlanerit akiuutsilissavagut, sungiusarluarsimallutillu eqquilluarsinnaapput soorlu arfininngornermi saassussinerup takutikkaa.
Sakkutooqarnikkut ajugaaffigineqarsinnaanngillat, taama generalit præsidentilu isumaqarput.
Sorsuunnerlu nikeriarfiusinnaanngitsoq sivisooq pinngitsoorniarlugu piaartumik Washingtonimi aalajangiisoqartariaqarpoq.
