Obama: 2001-imi Afghanistanimi toqoraaneq misissorneqassaaq

Siornatigut USA-mi præsidentiusup George W. Buship nalaani, Afghanistanimi 2001-imi toqoraaneq, USA-mi naalakkersuisunit isiginngitsuusaarneqarsimanersoq, USA-p præsidentiata Barack Obamap misissuiffigerusuppaa.
Allattoq Elisa Isaksen
juulip 13-at 2009 14:41

Afghanistanimiup sakkutuut naalagaata Abdul Rashid Dostum-ip sakkutuui, Talibaninik tigusanik 1000-inik toqoraasimasutut unnerluutigineqarput. Aviisimi New York Timesimi allaaserisami oqaatigineqarpoq, sakkutuut naalagaata eqqartuussisunut sassartinneqarnissaa Buship naalakkersuisuisa pinngitsoortissimagaat, pisimasup kingornagut sakkutuut naalagaata Amerikamiut sakkutuui ikiorsimammagit.

Isiginnittut nalunaarutaat najoqqutaralugit sakkutuut naalagaata Dostumip sakkutuuisa Talibanit containerinut saviminiusunut ammaneqanngitsunut ulluni pingasuni, nerisaqartinnagit imigassaqartinnagillu mattusimasimavaat. Ilarpassui containeriniitillutik ipillutik toqupput, ilaallu aallaallugit toqorarneqarlutik.

Taamaattumik Obamap atorfilittani pineqartumut paasissutissanik tamanik katerseqqullugit qinnuigisimavai.

- Aatsaat qanittukkut paasivara, pisimasoq naammaginartumik misissuiffigineqarsimanngitsoq, Barack Obama Amerikamiut tv-qarfianni CNN-imi apersorneqartilluni oqarpoq.

- Taamaattumik paasissutissat tamatumunga tunngasut tamarmik maanna katersorneqarnissaat piumasaraara, tamatuma kingornagut qanoq iliornissarput aalajangersinnaaniassagatsigu. Sorsunnermut tunngatillugu USA inatsisinik unioqqutitsisimappat tamanna paasisariaqaratsigu, Obama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq