NÛK marloriarluni ajugaavoq
Niviarsissat GSS aamma NÛK marlunngornermi unnukkut unammisut. Ass. Kathrine Kruse
Qularnaassorinarsinnaasumik NÛKp niviarsiartaasa målinik tallimat arfinilinnik siuaqqanertik annaangajalluinnarpaat marlunngornermi unnukkut illoqarfeqatitik GSS-meersut unammigamikkit.
- Mumereernermi NÛK unittuuleraluarpoq taamalu angutingajalluinnarluni, assammik arsartartut kattuffianni GHFmi siulittaasoq Boas Møller KNRimut oqarpoq.
NÛK ajugaavoq 20-19-mik muminnermi 11-9-mik siuaqqasimagaluarlutik. NÛKmeersoq Nivikka Rosing Kleemann unamminermi tassani arsarluarnerpaatut toqqarneqarpoq.
Ippassarlu unamminerup aappaa aamma pissanganavippoq tassani nukappissani unammimmata GSS aamma NÛK. Tassanilu aamma NÛK ajugaavoq.
- Muminnerup kingorna assorsuaq pissanganarput angusaqattaallutik unammigamik, Boas Møller oqaluttuarpoq.
NÛK ajugaavoq 21-20-mik muminnermi 10-7-mik siuaqqareerlutik. Karl Frederik Frederiksen GSSmeersoq unamminermi tassani arsarluarnerpaatut toqqarneqarpoq.
Unamminerit pingasunngornermi ualikkut ingerlaqqissapput imatullu unamminerit tulleriiaarneqarput:
Nal. 16.00 Kâgssagssuk - SAK (niviarsissat)
Nal. 17.30 Kâgssagssuk - Norsaq HC (nukappissat)
Nal. 19.00 Nagdlúnguak - GSS (niviarsissat)
Nal. 20.30 SAK - GSS (nukappissat)