Mittarfiit nutaat inuiaqatigiinnut akisoorujussuusinnaapput
Mittarfinnik nutaanik takinerusunillu sanaartornissamut pilersaarutit aalajangiiffigineqarnissaannut tunngaviginiarneqartut annikkipallaarput aningaasaqarnermut siunnersuisoqatigiit isumaqarput.
- Akit apparneqarpata takornariat tikittalertussat amerlassusissaat ilimagineqartoq qaffasippallaarpoq, Aningaasaqarnermut Siunnersuisoqatigiit siulittaasuat Torben M. Andersen, nunatta aningaasaqarnera pillugu nalunaarusiaq pingasunngornermi saqqummiukkamiuk oqarpoq.
Nuummi Ilulissanilu mittarfiit tallineqarnissannut, kiisalu Qaqortumi, Tasiilami Ittoqqortoormiinilu mittarfiliortoqarnissaanut aalajangiineq, Aniningaasaqarnermut Siunnersuisoqatigiit eqqarsarnartoqartippaat.
Misissueqqissaarnerit pisoqaavallaanngikkunik qajannartoqarput. Taamaammat Naalakkersuisut mittarfiit pillugit pilersaarutitut saqqummiussaat Inatsisartunilu akuerineqartoq nutaamik misissueqqissaarfigineqartariaqarpoq.
- Aarlerinartoq qanoq annertutigisoq Namminersorlutik Oqartussaniit tiguneqarnissaata naliliiviginissaa inuiaqatigiit aningaasaqarnerannit isigalugu pingaaruteqarpoq, Torben M. Andersen oqarpoq.
Siunnersuisoqatigiit erseqqissaatigaat suliniutit annertoorujussuullutillu akisuujummata misissueqqissaarnerit pingaaruteqartut, kisitsinerillu ataqatigiinngitsut takutinneqarpata kingunerluuteqanngaatsiarsinnaasut.
- Namminersorlutimmi Oqartussat kommunillu aningaasaqarnerannut sunniuteqassaaq, taamaammallu periarfissat marluinnaapput: tassalu akileraarutit qaffanneqanngikkunik annertuumik sipaarniartoqartariaqarpoq, Torben M. Andersen oqarpoq.
Suliniutit taama annertutigisut aningaasatigut kingunerisinnaasaata paasinissaat pingaaruteqartorujussuusoq, Aningaasaqarnermut Naalakkersuisup Randi Vestergaard Evaldsenip miserratiginngilaa.
Oqaatigaalu Namminersorlutik Oqartussat suliffeqarfiutaata Kalaallit Airportsip mittarfiit pillugit pilersaarusiornertik suliariinnassagaat.
- Tassa siullermik oqaatigissavara uani toqqammavigineqartut aammalu suliassat tullinnguuttut kalaallit airportsip aamma suliarisussaammagit, taamaammat aamma pilersinneqarnikuupput, projektit aammalu aningaasalersornissai isigineqassammat,
Aningaasaqarnermut Naalakkersuisoq oqarpoq.
Randi Vestergaard Evaldsenip aamma oqaatigaa, angallassinermut suleqatigiissitami siulittaasuusimasoq, Christen Sørensen piumaffigisimallugu kisitsisit inuiaqatigiinnut aningaasaqarnikkut sunniutaasussat 2009-mi suleqatigiissitap saqqummiussimasai nutarsaqqullugit.
Suliaq aallartereersoq, Kalaallit Airportsilu aamma sulilereersoq, kisitsisillu tassunga tunngasut saqqummiunneqarumaartut, naalakkersuisup oqaatigaa.
- inuiaqatigiinnut aningaasaqarnikkut sunniutissai nutaajussasut taannalu aamma sulissutigineqarpoq, Randi Vestergaard Evaldsen oqarpoq.
