Uuliasiornissamut gasseqarneranillu misissuinissamut qinnuteqaatit marluk Namminersorlutik Oqartussanut tunniunneqarput
Suliffeqarfik Panoceanic Energy Limited qinnuteqaatinik marlunnik tunniussisuuvoq.
Suliffeqarfiullu qinnuteqaatini ataaseq, kujataata avataatungaani kulbrinteqarneranik misissuiffiusussaq kisermaassiffigissallugu siorna aggustimi akuersissuteqarfigereersimavaa.
Sumiiffinnilu marlunni kisermaassilluni misissuinissamut suliffeqarfimmiit maanna qinnuteqarput.
Inuussutissarsiornermut nukissiuuteqarnermullu naalakkersuisoq Aqqalu Jeremiassen qinnuteqaatit pillugit ima oqarpoq.
- Nuannaarutigaarput uuliamik misissuinissamut qinnuteqaatit arlallit tigusimagatsigit. 2019 qilanaarnarpoq, tassami Naalakkersuisut Kalaallit Nunaata uuliamik gassimillu ilippanaataasa tuniniarnissaat annertusartussaammatigit.
Qinnuteqaatit taakkua tiguneqartut marluk suliarineqarnissaat aallartittoq naalakkersuisup ilanngullugu paasissutissiissutigaa.