Ilisimatuutut misissuineq nutaaq: Qeqertaalummi nannut immap sikuerukkiartorneranik unammillernartorsiussasut

Qeqertaalummi nannut immap sikuata annikilliartuinnarnerata malitsigisaanik salunnerulertillu peqqiinnerulerput.

Tamanna nannut marlunnik ernisartut ikinnerulerneranik ilaatigut kinguneqassasoq, Ecological Applicationsimi ilisimatuutut allakaatigisami inerniliunneqarpoq.

Nunatsinni Pinngortitaleriffimmit Seattlemilu Washington Universitetiminngaanniit ilisimatuup, allaatigisamik allaatiginnittuusup, Kristin Laidrep suleqatinilu nannunik immallu sikuanik misissuinerminni qaammataasatigut nakkutiginninnerit, assilisat, pinngortitat inuunerannut tunngasunik uuttuinerit misiliinerillu atorpaat.

Ataasiinnarmik piaqqisassasut

Immap sikua kinguariartornerata malitsigisaanik nannut piniartarnerisa piffissaat sivikilliartorpoq, taamaalillunilu sivisuumik nerisaqanngiffii nunamiittarnerilu sivisuneruleriarpoq.

Taamaammat salunnerulerput peqqinniillerulerlutillu taamaalillunilu piaqqiniarnerat ajornarnerulerluni.

Ilisimatuut paasissutissat atorlugit nannut Qeqertaalummi ineriartornerannik siulittuipput.

Nannut arnavissat amerlanerungaatsiartut ullumikkutulli nalinginnaasumik marlunnik piaqqinatik 2050-ip naanerani ataasiinnarmik piaqqisalissapput.

Qeqertaalummi sumiiffinni nannut 2800-sut naliliinerup kingulliup takutippaa.

Nalunaarsugaq: KNR-ip ilisimatuutut suliaqarneq una ”Baffinip Kangerliumarngarni nannut ajunngitsut”-mik qulequtserlugu siusinnerusumi allaaseraa. Ilisimatuutut misissuinermut kukkusumik inerniliinerugallarpoq. Ilanngutassiaq siulleq ilanngutassiamik matumanik taarserneqarpoq.