Ny Alliance Kalaallit Nunaat pillugu suli politikkeqanngilaq

Partii Danmarkimi nutaaq ”Ny Alliance” suli politikikkut isummersuutiminik allaaserisani naammassinngilaa. Tassa politikikkut anguniakkat suli erseqqivissumik saqqummiunneqanngillat.

- Suli Kalaallit Nunaat pillugu apeqqutit aamma inissinneqanngillat, Kalaallit Nunaat pillugu apeqqutit politikkikkut anguniakkat ilusilersornerini soorunami ilaassapput. Politikikkut programmip ukiap ingerlanerani saqqummiunneqarnissaa naatsorsuutigaarput, taama Ny Alliancep allaffeqarfiani pisortaq Lars Eriksen radioaviisimut oqarpoq.

Ny Alliance maajip ulluisa arfineq-aappaanni ilisaritinneqarpoq Radikale Venstremi ilaasortaasimasunit Naser Khader aamma Anders Samuelsenimit kiisalu konservativit sinnerlugit folketingimi ilaasortaasumit Gitte Seebergimit.

Ny Alliance maanna 20.000-ingajalluinnarnit ilaasortaaffigineqarpoq. Sapaatip-akunneratalu uuma siuliani partiip nutaap atsiornerit 20.000-t Danmarkimi pissutsinut naalakkersuisoqarfimmut indenrigsministeriamut tunniuppai, taamaalillutillu folketingimut qinersinissamut partii qinigassanngortitsisinnaanngorlugu.