Nuutsitat pillugit aallakaatitassiaq Canadami takutinneqassaaq
Kunuk-p TV-kkut piviusulersaarusiaa, ilaqutariit inuit 1953-imi najukkaminnit 1.500 kilometerinik avannarpasinnerusumut pinngitsaalisamik nuutsitaanerannik oqaluttuaavoq.
Ilaqutariit arlallit Quebec-ip avannaaniit, maanna Nunavik-mmik taagukkamiit Umimmaat Nunaannut ”Ellesmere Island”-imut piniarfiluttumut inuuniarfiluttumullu nuutsitaanerannik oqaluttuaavoq.
Kunuk-p piviusulersaarusiamini ilaqutariit ingerlaarfiat illinersiorlugulusooq oqaluttuaraa, taamani nuutsitaasimasut suli ullumikkut inuusut kinguaavisalu naalliuutaat oqaluttuaritinneqarlutik.
Zakarias Kunuk-p ilisimaneqaatigaa Atanarjuaq – ”The Fast Runner”, filmiliaalluarnerpaatut Cannes-imi akissarsisinneqarnikuusoq.
Kunuk-p piviusulersaarusiamini nutaami Melanie McGrath-ip inuit pinngitsaalisaallutik nuutsitaasimasut pillugit atuakkiaa tunngavigaa.
Aamma piviusulersaarusiami naalakkersuisut Ottawa-mi apersorneqarput, pinngitsaalisaalluni nuutsitsineq pillugu ataatsimiititaliamit 1993-imi oqaaserineqartut apersuutigineqarlutik. Taamani oqaatigineqarpoq, nuutsitsisimaneq Canadami inuit pisinnaatitaaffiinik unioqqutitsinerit annersaasa ilagigaat.