Nuussuarmi oqaluffik nunguusavilluni ikuallappoq
Oqaluffik arfineq-pingasut missarpiaani ikuallalersimavoq, qatserutit pumpiisa aallartinniaasaarnerannik pissuteqartumik qatserineq qulingiluat missarpiaani aatsaat aallartissimavoq, aatsaallu unnukkut qamivinneqarsinnaasimalluni.
Nuussuarmi oqaluffiup iigai silarliit kisimik maanna napapput, iluali atoqqissinnaajunnaavilluni ikuallassimasoq, ilanngutassiortoq Arnaq H. Jansen nalunaarpoq.
Nuussuarmi oqaluffik 1939-imi februaarimi atulersoq kiassaatimigut ajoquteqarsimagunarluni ikuallalersimasoq, qatserisartut oqaatigigaat, Arnaq H. Jansen oqaluttuarpoq.
Upernavimmiit qatserisartunik ikuallannerup qanoq aallartissimasinnaaneranik misissuiartortunik sila atoruminarseriarpat tikittoqassasoq ilanngullugu ilisimatitsissutigaa.