Nuup nunaqarfii ineriartortinneqarusupput
Naatsorsueqqissaartarfiup kisitsisaataasa takutippaat Nuup nunaqarfiini innuttaasut ukiuni qulini 125-inik ikileriarsimasut.
Kapisilinni Qeqertarsuatsiaanilu nunaqarfinni aqutsisunut ilaasortat radioavisimut ippassigami oqarput, nunaqarfitik ineriartorteqqissappata suliffinnik aalaakkaasunik inissanillu pilersitsisoqartariaqartoq.
Kommunimit nunaqarfiit suliniarfigineqartut, Nuup Kommunalbestyrelseani teknikkimut ataatsimiititaliami siulittaasoq Nikolaj Heinrich oqarpoq.
- Imaanngilaq qarsupiinnarneqartut imaluunniit isiginngitsuusaarneqartut. Kommunalbestyrelsemi sulinitsinni tamakku tamaasa eqqarsaatigaagut. Qeqertarsuatsiaani massakkut inissaaleqisut pappiaqqatigut allanneqarsimasut nunaqarfimmi aqutsisut 21-unerarpaat.
21-illu taakku akornanniipput inuusuttut suli maannamut angajoqqaaminni najugaqartut aammalu aappaminniittut.
- Taakku saniatigut nuannersumik tusagassaqarpoq, tassalu Qeqertarsuatsiaanut nuukkumasunik arlalinnik peqalersimammat, taamaalilluni inuerukkiartornermik oqalunneq ilumuuinngilaq, illuatungilerneqarsinnaavoq.
Nammineq illuliorsinnaanerup saniatigut kommuni aappaagumut aningaasaliissutissat oqaluuserineranni kommunip Qeqertarsuatsiaani pingasunik sisamanilluunniit illuliornissaa qangali siunnersuutaasareersoq eqqartoqqinneqassasoq. Nikolaj Heinrich erseqqissaavoq.
Kapisilinnili nunaqarfiup aqutsisui suliniutissanut atatillugu inissaaleqinermik eqqaasaqarsimanngillat:
- Kapisilimmiut namminneq inigisaqarneq illoqarneq eqqarsaatigalugu, nunaqarfinni aqutsisut 2008-mut aningaasanut inatsisissap sulianeqarneranut siunnersuuteqanngillat, kisianni ugguunartaatigut aaqqiisoqarnissaa kommunalbestyrelsemi aamma isummerfiginikuuarput, Nikolaj Heinrich nassuiaalluni aallartippoq.
- Kapisilinniuna init/illut atorunnaaqattaartut ukiuni kingullerni ilaatigut Nuummut nuuttoqartarneratigut Iserit-iminngaanniit ilaatigut Kapisilinni akisussaasut, nunaqarfiit aqutsisuit, avaqqutiinnarlugit illut tuniniarneqartarsimagamik.
Kommunalbestyrelsemi ilaasortaq isumaqaropoq taamaalilluni ilaatigut Kapisilinni inissaaleqisoqaraluartoq innuttaasut periarfissinneqanngitsoortarsimasut.
- Kusanaatsutut kommunalbestyrelsemi isigaarput aamma oqaatigaarput taamaattumillu piumasaqaatigalugu illunik atorunnaartoqassappat arlaatigut qanoq iliuuseqaqqaartussat tassaammata nunaqarfimmi aqutsisut. Taamaattoqajaarsimasuuppat immaqa tappikani inissaaleqisoqarsimassappat annikinnerusimasinnaagaluarpoq, Nikolaj Heinrich oqarpoq.
Nuup Kommunalbestyrelseata sapaatip-akunnerata tulliani missingersuusiat tulleriissaagassallu oqaluuserissavai, tassanilu nunaqarfinni illussanik sanaartornissat pingaartillugit eqqartorneqassapput.
Nunatsinni nunaqarfiit innuttai Naatsorsueqqissaartarfiup kisitsisaatai malillugit ukiuni qulini kingullerni 939-inik ikileriarsimapput.
Nunaqarfiit 15-it inuttuseriarsimapput, amerlanerpaanik inuttuseriarsimallutik Upernaviup pigisai Kullorsuaq Innarsuillu, Ilulissat pigisaat Qeqertaq aamma Tasiilap pigisaa Sermiligaaq.
