Nuup kujataani Kangerlummi Ameralimmiit Qeqertarsuatsiaat kujataaniittoq sioraq tikillugu tuttuniarneq ullumimiit unippoq, Avatangiisinut Pinngortitamullu pisortaqarfik nalunaarpoq. Kujasinnerusumi tassalu Qassini Neriami Sioqqamiillu Ivittuut kommuniata killeqarfia kujammut tikillugu tuttuniarneq oktoberip ulluisa 15ata tungaanut ammatinneqarpoq.
Nuup avannaani Naternamiit Nuup Kangerlua tikillugu saniatigooralugu piniartartunut tuttunniarsinnaaneq novemberip ulluisa 15-ata tungaanut ingerlanneqarsinnaavoq. Akiliilluni avaarnissamut akueritissimasut inuussutissarsiutigalugulu piniartut februarip ulluisa 28-ata tungaanut tuttunniarsinnaatitaapput.
Avatangiisinut Pinngortitamullu pisortaqarfik tusagassiuutinut nalunaaruteqarnermini erseqqissarpaa, piniarsinnaanermut akuersissummik pissarsisimasut immersuinissartik eqqaamassagaat, pisaqarsimanngikkaluaraanniluunniit. Paasissutisssat biologit siunnersorneqarnissaannut atorneqartussaammat.
